Prif Gynllun Porth Tywyn

Ysgol Parc y Tywyn         

Mae Ysgol newydd Parc y Tywyn wedi'i chwblhau'n ddiweddar, ac mae'r safle newydd wedi'i leoli'n ddelfrydol gan ei fod yn agos i'r harbwr ac i ganol y dref. Mae'r disgyblion wedi symud i'r ysgol hollol gyfoes werth £9.6 miliwn, sy'n cynnig lleoedd eang ac ysbrydoledig ar gyfer dysgu, mewn amgylchedd uwch-dechnoleg.

Cafodd yr ysgol gynradd cyfrwng Cymraeg ei hadeiladu yn unol â'r safon uchaf o ran effeithlonrwydd ynni, ac mae'n bodloni statws Passivhaus a safon 'Rhagorol' BREEAM. Mae'r ysgol newydd wedi cael ei darparu drwy Raglen Moderneiddio Addysg Cyngor Sir Caerfyrddin ac wedi'i hariannu ar y cyd â Llywodraeth Cymru.

Safle Datblygu Teras Glanmor

Mae caniatâd cynllunio wedi'i roi yn ddiweddar ar gyfer 32 o dai eco-gydnaws, ar ôl i Cartrefi Croeso, cwmni tai newydd Cyngor Sir Caerfyrddin, sicrhau pecyn cyllid o £4 miliwn.

Roedd Llywodraeth Cymru wedi cynnwys datblygiad uchelgeisiol Pentref Gardd Porth Tywyn yn ei grant £43 miliwn Rhaglen Tai Arloesol a bydd y cynllun arfaethedig yn darparu cyfuniad o dai ar dir wrth ymyl Cynllun Gofal Ychwanegol Plas y Môr yn y dref.

Mae cynlluniau cyffrous wedi cael eu llunio sy'n cynnwys nodweddion eco-gydnaws megis paneli haul a phren o Gymru sy'n cael ei weithgynhyrchu'n lleol, a fydd yn helpu preswylwyr i arbed hyd at £1,000 y flwyddyn ar eu biliau ynni. Caiff y tai eu dylunio i annog ffyrdd o fyw nad ydynt yn defnyddio llawer o ynni, i wella iechyd a lles ac i liniaru tlodi tanwydd.

Safle Preswyl

Yn amodol ar ganiatâd cynllunio, mae Cyngor Sir Caerfyrddin wedi prynu safle Grillo 7.26 erw ym Mhorth Tywyn, ger tir presennol Cyd-fenter Morlan Elli, er mwyn darparu datblygiad preswyl 15.25 erw yng nghanol ardal yr harbwr.

Bydd prynu'r tir yn galluogi'r Cyngor i hwyluso'r gwaith o adfywio'r safle tir llwyd hwn er mwyn darparu hyd at 364 o anheddau preswyl a 465 metr sgwâr (5,005 troedfedd sgwâr) o gyfleusterau adwerthu a hamdden mewn lleoliad allweddol ar y glannau, gan wella ymhellach yr hyn a gynigir yn Harbwr Porth Tywyn yn ogystal ag ychwanegu ato.

Adeilad newydd yr RNLI

Mae'r Orsaf Bad Achub newydd wedi'i chwblhau ac mae'n cynnig gwelliannau mawr i griw'r RNLI a'r cyhoedd. Mae paneli haul a gwres o'r ddaear wedi'u gosod yn yr adeilad, a fydd bellach yn gartref i ddau fad yn yr un adeilad. Mae'r cyfleuster yn cynnwys ystafell rheoli gweithrediadau benodol, ystafell i'r criw, ystafelloedd newid, swyddfa ac ystafell hyfforddi i'r criw ei defnyddio ac ar gyfer rhoi sgyrsiau addysgol i ddisgyblion ysgol sy'n ymweld â'r orsaf.

Yn yr adeilad y mae siop RNLI barhaol, a fydd yn cael ei gwella fel ardal ar gyfer ymwelwyr gyda chyfleusterau sgrin gyffwrdd ac arddangosfeydd. Yn ogystal â hyn, bydd y ffenestri ar y llawr cyntaf yn galluogi ymwelwyr i edrych ar y badau achub a'u gwylio'n cael eu lansio mewn lle diogel.

Marina

Mae 450 o leoedd ym Marina Porth Tywyn, felly gallwch hwylio ar hyd yr arfordir prydferth drwy'r flwyddyn. Caiff y marina ei reoli gan y Marine Group ac fel rhan o'r prif gynllun ehangach ar gyfer yr harbwr, mae cynlluniau pellach ar waith i wella'r marina, gan gynnwys:

• Buddsoddiad cyfalaf mewn offer codi cychod
• Rhaglen garthu dreigl
• Gwaith i wella'r cyfleusterau
• Ychwanegu cyfleusterau ail-lenwi diesel
• Cynnal a chadw a gwella pontynau

Yn ogystal â hyn, ac yn amodol ar ganiatâd cynllunio, mae'r cynlluniau'n cynnwys swyddfa newydd yn y marina, cawodydd/toiledau a chaffi/bwyty yn hen adeilad yr RNLI.

Gallwch weld rhagor o fanylion ar wefan y Marine Group.

Pentref Menter

Bydd y safle'n darparu 10,500 troedfedd sgwâr o le cyflogaeth ynghyd ag elfen o unedau gwaith byw a'r posibilrwydd o ddefnydd cysylltiedig â'r marina er mwyn cefnogi a hyrwyddo gweithgarwch yn yr harbwr.

Hamdden Mascnachol

Mae'r safle'n cynnwys 2.8 erw o dir ar gyfer cynllun datblygu defnydd cymysg gan gynnwys oddeutu 5,000 metr sgwâr (54,000 troedfedd sgwâr) ar gyfer adwerthu, gwestai, tafarnau/bwytai ac unedau preswyl. Gellir manteisio ar leoliad strategol y tir yng nghanol Harbwr Porth Tywyn i greu ffrynt bywiog ar hyd y marina.

Safle'r siop fwyd

Mae'r safle'n cynnwys 3.8 erw o dir ar gyfer gweithredwr siopau bwyd mawr. Mae'r safle yn agos iawn i ganol y dref ac mae ganddo drafnidiaeth gyhoeddus a chysylltiadau ffyrdd da.

Yn yr arolwg mwyaf diweddar a gynhaliwyd gan Nathanial Lichfield & Partners fel rhan o'i Astudiaeth Adwerthu 2015, dangoswyd mai dim ond 2.2% o aelwydydd yn ardal Porth Tywyn/Cydweli sy'n prynu'r rhan fwyaf o'u bwyd mewn siop ym Mhorth Tywyn. Yn ogystal â hyn, mae 19.8% ohonynt yn defnyddio siop ym Mhorth Tywyn i brynu nifer fach o nwyddau, sy'n nodi bod angen gweithredwr siop fwy yn ardal Porth Tywyn.

Am ragor o wybodaeth anfonwch e-bost llanelliwaterside@sirgar.gov.uk.