Llanelli

 

Llanelli yw tref fwyaf Sir Gaerfyrddin ac mae wedi'i lleoli ar arfordir De Cymru, ger Aber Afon Llwchwr a Chilfach Tywyn. Mae'r dref yn adnabyddus am ei Barc Arfordirol y Mileniwm, man gwyrdd godidog sy'n ymestyn ar hyd yr arfordir.

Mae yno lwybrau cerdded a beicio, cynefinoedd bywyd gwyllt, a mannau hamdden i’r cyhoedd eu mwynhau. Yn y gorffennol, roedd Llanelli yn ganolfan bwysig ar gyfer y diwydiant tunplat, a chwaraeodd ran bwysig iawn yn nhwf economaidd y dref yn ystod y 19eg a'r 20fed ganrif. Ynghyd â hyn, mae gan Lanelli hanes cyfoethog o gloddio am lo, a oedd yn ddiwydiant hanfodol yn y rhanbarth yn ystod y chwyldro diwydiannol.

Mae Canol Tref Llanelli o fewn ward etholiadol Tyisha sydd â phoblogaeth o 5,000. Cynhelir digwyddiadau a gwyliau diwylliannol amrywiol yn rheolaidd yng nghanol y dref i ddenu pobl leol ac ymwelwyr i'r dref

DARGANFOD LLANELLI

 

Cynllun Creu Lleoedd Llanelli

Cafodd ein Prif Gynlluniau Adfer blaenorol eu creu yn ystod cyfnod o angen brys a hynny yn dilyn pandemig byd-eang.

Nawr, bedair blynedd yn ddiweddarach wrth i'n cymunedau symud ymlaen, rydyn ni'n edrych o'r newydd ar sut y gall canol ein trefi ffynnu yn y tymor hir. Mae'r Cynlluniau Creu Lleoedd newydd yn canolbwyntio ar greu lleoedd bywiog, croesawgar sy'n cefnogi busnesau lleol, yn dathlu ein treftadaeth, ac yn diwallu anghenion trigolion lleol ac ymwelwyr fel ei gilydd.

Bydd y cynllun creu lleoedd hwn yn cefnogi prif randdeiliaid Llanelli i ymgeisio am gyllid gan gyrff ariannu gan gynnwys Llywodraeth Cymru a Llywodraeth y DU. Bydd gan bob un o randdeiliaid Llanelli rhan i’w chwarae yn y broses o gyflawni’r cynllun creu lleoedd hwn.

Astudiaethau Achos

Y Gronfa Eiddo Gwag

 

Dyma rai busnesau yn Llanelli a gafodd gyllid. Darllenwch am sut y defnyddiwyd y cronfeydd a pha effaith gafodd y cyllid ar y busnesau.

 

Martin Taffetsauffer Building and Civil Engineering Contractors Ltd (Llanelli)

A allwch chi ddweud rhywfaint wrthym am eich sefydliad a beth wnaeth eich ysbrydoli i ddechrau a'i rôl o fewn y gymuned leol?

Rydym yn gontractwr lleol sydd wedi hen ennill ein plwy ac mae ein gwreiddiau yn ddwfn yn y gymuned. Ein nod bob amser oedd darparu prosiectau adeiladu ac ailddatblygu o safon sy'n rhoi bywyd newydd i fannau sydd heb eu defnyddio. Rydym yn angerddol am gefnogi busnesau lleol a chreu lleoedd sydd o fudd i'r gymuned ehangach. Daeth y cyfle i adnewyddu 6 Stryd Cowell o'n hymrwymiad i adfywio adeiladau gwag wrth alluogi mentrau lleol i ffynnu. 

Sut mae Cronfa Ffyniant Gyffredin y DU wedi cefnogi'ch sefydliad a pha welliannau neu newidiadau penodol ydych chi wedi gallu eu gwneud gyda'r cyllid? 

Gyda grant o £30,000 (cyfradd ymyrraeth o 47.23%), roedden ni'n gallu ailddatblygu llawr gwaelod 6 Stryd Cowell i gyd. Cafodd y lle ei adnewyddu i ddarparu ar gyfer busnes trin gwallt lleol sy'n tyfu. Mae'r cyllid yn ein galluogi i gyflawni gwelliannau strwythurol, adnewyddiadau mewnol, a gwaith uwchraddio hanfodol gan droi uned wag yn fan masnachol bywiog, swyddogaethol.

Pa effaith y mae'r prosiect hwn wedi'i chael ar y gymuned leol hyd yn hyn a sut maen nhw wedi ymateb i'r gwasanaethau/gwelliannau rydych chi wedi'u gwneud?

Mae'r gwaith ailddatblygu wedi cael effaith gadarnhaol ar unwaith ar y busnes a'r gymuned ehangach. Mae'r cwmni trin gwallt bellach yn gweithredu mewn uned llawer mwy, mwy hygyrch, gan ei alluogi i ehangu gwasanaethau a chroesawu mwy o gleientiaid.  Mae un swydd eisoes wedi'i diogelu, ac rydyn ni'n rhagweld y bydd swyddi ychwanegol yn cael eu creu yn y misoedd nesaf. Mae'r adeiladau wedi'u huwchraddio yn cefnogi twf busnes ac yn ychwanegu gwerth at ganol y dref, gan helpu i greu stryd fawr fwy deniadol a gweithgar. Mae adborth cymunedol wedi bod yn gadarnhaol iawn, ac rydyn ni'n falch o fod wedi cyfrannu at wydnwch economaidd lleol. 

 

 

Shire Coffee

A allwch chi ddweud rhywfaint wrthym am eich sefydliad a beth wnaeth eich ysbrydoli i ddechrau a'i rôl o fewn y gymuned leol?

Rydyn ni'n fusnes annibynnol sydd ag angerdd am goffi o ansawdd uchel a chreu mannau cynnes, croesawgar i'r gymuned leol. Ein gweledigaeth bob amser yw creu siop goffi sy'n dod â phobl at ei gilydd i gyfarfod, ymlacio, a mwynhau diodydd lleol mewn lleoliad hyfryd. Cawsom ein denu at y cyfle yn 57–59 Stryd Stepney oherwydd i ni weld potensial i drawsnewid adeilad gwag ers amser maith yn adeilad bywiog a gwerthfawr i ganol y dref.

Sut mae Cronfa Ffyniant Gyffredin y DU wedi cefnogi'ch sefydliad a pha welliannau neu newidiadau penodol ydych chi wedi gallu eu gwneud gyda'r cyllid? 

Dyfarnwyd grant o £16,254.01 i ni (sy'n talu 70% o gyfanswm y costau) i ailddatblygu'r uned, a oedd wedi bod yn wag ers tair blynedd. Mae'r cyllid yn caniatáu inni gynnal gwaith adnewyddu hanfodol gan gynnwys gwelliannau strwythurol, gosod ffitiadau mewnol, ac uwchraddio hygyrchedd gan greu bar espresso o safon uchel a lle i 16 o westeion i eistedd. Heb y gefnogaeth hon, ni fyddai wedi bod yn bosibl i ni gymryd prosiect o'r raddfa hon yn ariannol. 

Pa effaith y mae'r prosiect hwn wedi'i chael ar y gymuned leol hyd yma a sut maen nhw wedi ymateb i'r gwasanaethau/gwelliannau rydych chi wedi'u gwneud?

Er ein bod yn aros am gadarnhad terfynol o'n dyddiad agoriadol, mae'r ymateb gan y gymuned eisoes wedi bod yn hynod frwdfrydig. Mae awydd cryf am gaffis annibynnol o safon yn yr ardal, ac rydyn ni'n gyffrous i ddod yn rhan o fywydau beunyddiol trigolion, gweithwyr ac ymwelwyr cyn hir. Mae'r prosiect wedi cefnogi'r gwaith o greu dwy swydd newydd, ac mae gyda ni gynlluniau ar gyfer ehangu yn y dyfodol. Rydyn ni'n credu y bydd ein presenoldeb yn gwella'r stryd fawr leol, gan annog ymwelwyr a chyfrannu at ganol y dref fwy deinamig.

Cronfa Adnewyddu Canol Trefi

Mae'r Gronfa yn cynnig hyd at £2k fesul eiddo, tuag at 80% o'r costau cymwys, i wella tu blaen siopau a gwneud canol trefi yn fwy deniadol. Gall rhydd-ddeiliaid a lesddeiliaid eiddo yng nghanol trefi Sir wneud cais am gyllid i gefnogi amrywiaeth o welliannau gan gynnwys addurno allanol, paentio, gosod golau, glanhau gwter a mwy. Drwy wella golwg eiddo masnachol, nod y gronfa hon yw creu strydoedd mwy deniadol a chroesawgar sydd o fudd i fusnesau, preswylwyr ac ymwelwyr fel ei gilydd.

 

1 - Yr Oriel

Cafodd y busnes gyllid grant o £1,520 fel rhan o gynllun gwerth £1,900 sy'n galluogi uwchraddio blaen y siop ac ardaloedd arddangos. Mae'r gwelliannau hyn wedi helpu i greu amgylchedd mwy deniadol a phroffesiynol.

2 - RSPCA

Mae'r elusen hon, sydd yn 43 Stryd Stepney, wedi cael cyllid grant o £2,000 fel rhan o gynllun gwerth £3,650 i wneud gwelliannau hanfodol i'r safle, gwella ei ymddangosiad a helpu i greu amgylchedd mwy croesawgar i ymwelwyr.

3 - Quay Side Medical Aesthetics LTD

Cafodd y busnes gyllid grant o £1,912.00 fel rhan o gynllun gwerth £2,390.00 ar uwchraddio sydd wedi gwella ymddangosiad ac amgylchedd proffesiynol y safle. 

4 - Caffi Avo

Cafodd y busnes hwn, sydd yn 28 Stryd y Farchnad, gyllid grant o £1,649.28 fel rhan o gynllun gwerth £2,061.60 i wella ei safle, gan adnewyddu ymddangosiad y caffi gan helpu i ddenu cwsmeriaid 

5 - Amy’s

Wedi'i leoli yn 1 Stryd Cowell, mae Amy's elwa ar gymorth grant busnes o £2,000 fel rhan o gynllun gwerth £2,500 i wella ei safle, gan gefnogi gwelliannau allweddol ar flaen y siop a phrofiad cyffredinol y cwsmer. 

Ymyrraeth Landlordiaid Allanol

Wedi'i lansio yn 2024, mae cynllun grant wedi'i dargedu o £130,000 yn cefnogi'r gwaith o adfywio eiddo masnachol gwag ar y llawr gwaelod yn Rhydaman, Caerfyrddin a Llanelli, gan helpu i drawsnewid unedau gwag yn fannau busnes ffyniannus.

Ers ei lansio ym mis Rhagfyr 2024 mae wedi dod â 15 eiddo gwag yn ôl i ddefnydd trwy brydlesi tymor byr, gan roi cyfle i entrepreneuriaid a busnesau bach dreialu eu mentrau yn adeiladau canol y dref.

  • 11 Stryd Vaughan

Eiddo Gwag

Isod fe welwch restr o eiddo sydd ar gael i'w gosod yng nghanol y dref. Cliciwch ar y ddolen i gael rhagor o wybodaeth am yr eiddo.

Manylion Cyswllt Swyddog Cyngor Sir Caerfyrddin

Os hoffech gysylltu â'r awdurdod ynglŷn â Chanol Tref Llanelli, mae croeso i chi gysylltu â’n swyddogion sy’n gyfrifol am y ganolfan a byddant yn fwy na pharod i helpu:

Trefi@sirgar.gov.uk

Hwb