Cynllun Toiledau Cymunedol

Mae’r Cynllun Toiledau Cymunedol yn gynllun partneriaeth sy’n cael ei gynnig gan fusnesau a Chyngor Sir Caerfyrddin, sy’n darparu toiledau lleol ychwanegol, sydd am ddim i aelodau’r cyhoedd eu defnyddio heb fod angen prynu rhywbeth.

Mae’r cynllun hwn yn galluogi mynediad pellach i ddarpariaeth toiledau lleol drwy weithio mewn partneriaeth â busnesau i ddarparu toiledau glân, diogel a hygyrch sydd ar gael i’r cyhoedd.

Bydd toiledau lleol sydd ar gael fel rhan o’r cynllun yn cael eu hysbysebu ar ein cyfryngau cymdeithasol, ein gwefan ac yn y wasg leol. Fel rhan o fod yn aelod o’r cynllun, bydd gofyn i fusnesau osod arwyddion yn eu ffenestri i hysbysu aelodau’r cyhoedd fod toiledau ar gael i’w defnyddio.

Gellir gweld y busnesau sy’n rhan o’r cynllun ar y map Yn fy ardal.

Os ydych yn fusnes lleol a’ch bod am ymuno â'r cynllun hwn, gweler isod y wybodaeth am sut i wneud cais.

Manteision ymuno â'r Cynllun

Mae manteision ymuno â’r Cynllun Toiledau Cymunedol fel a ganlyn:

Cynnydd mewn traffig: Gall croesawu’r cyhoedd i ddefnyddio’ch cyfleusterau arwain at fwy o ymwelwyr, gan gynyddu eich cwsmeriaid o bosibl.
Cyhoeddusrwydd am ddim: Bydd eich busnes yn cael ei restru ar wefan y cyngor a deunyddiau hyrwyddo eraill, gan gynyddu eich gwelededd.
Gwell enw da: Mae bod yn rhan o’r fenter hon yn dangos eich ymrwymiad i gefnogi’r gymuned leol, a all wella eich enw da a meithrin teyrngarwch cwsmeriaid.
Effaith gadarnhaol ar y gymuned: Mae darparu toiledau hygyrch yn helpu i wella ansawdd bywyd trigolion ac ymwelwyr, yn enwedig i'r rhai â chyflyrau meddygol, teuluoedd â phlant ifanc, a'r henoed.
Cefnogaeth i Iechyd y Cyhoedd: Trwy ddarparu toiledau hygyrch, rydych chi'n helpu i gefnogi pobl â phroblemau iechyd, gan eu hannog i ymweld â'ch ardal.