Fy Nghyfrifon

Gweithio yn Sir Gâr

Astudiaethau Achos

Llwyddiant ffair swyddi – Stori Chloe

Llun o Chloe a Kirsty

Pan gofrestrodd Chloe gyda Gweithio Sir Gâr, roedd hi'n gweithio llai nag 16 awr gydag asiantaeth addysgu. Nid oedd hi'n cael oriau cyson yn ei rôl bresennol a phenderfynodd ei bod hi am newid gyrfa.

Cafodd Chloe fentor, sef Bethan. Roedd yn amlwg yn y cyfarfod cychwynnol nad oedd hi'n siŵr pa yrfa roedd hi am ei dilyn. Awgrymodd Bethan a Becca, ein swyddog cyswllt cyflogaeth, y dylai Chloe fynd i ffair swyddi’r haf Gweithio Sir Gâr lle gallai hi gwrdd a thrafod gyda 24 o gyflogwyr lleol am swyddi gwag oedd ar gael yn Sir Gaerfyrddin./p>

Yn ystod y digwyddiad, siaradodd Chloe â Swyddog Adnoddau Dynol yn Heddlu Dyfed-Powys, a roddodd wybodaeth fanwl am y prentisiaethau a'r cyfleoedd gwaith oedd ar gael yno. Roedd un rôl yn denu sylw Chloe, felly manteisiodd ar y cyfle hwn i ofyn rhagor o gwestiynau am sut y gallai ei phrofiadau blaenorol gysylltu â'r rôl.

Yn dilyn y sgwrs, gwnaeth Chloe gais am y swydd. Ar ôl hynny, cafodd ei gwahodd i gyfweliad a llwyddodd i gael y swydd. Erbyn hyn mae Chloe yn gweithio'n llawn amser yn Heddlu Dyfed-Powys ac yn mwynhau ei rôl.

"Hoffwn i ddiolch i Gweithio Sir Gâr am eu cefnogaeth. Yn un o'u ffeiriau swyddi, fe wnaethon nhw fy nghyflwyno i Kirsty, Ymgynghorydd Adnoddau Dynol o Heddlu Dyfed-Powys. Fe fuon ni'n siarad am un o'r rolau roedden nhw'n recriwtio iddi ac ar ôl dysgu mwy am y rôl dan sylw, penderfynais i wneud cais. Yn ffodus iawn, fe ges i'r swydd ac rwy'n ei mwynhau'n fawr." -Chloe

Llwyddiant drwy'r Rhaglen Llwybr Ieuenctid

Milan, Emma, Ross ac Owen tu allan Nandos

Cafodd Milan ei gyfeirio at Raglen Llwybr Ieuenctid Gweithio Sir Gar gan ei hyfforddwr gwaith yn y ganolfan waith. Mae'r rhaglen yn cefnogi'r rheiny rhwng 16 a 19 oed i feithrin hyder a gwella eu sgiliau cyflogadwyedd.

 
Symudodd Milan i Gymru ychydig flynyddoedd yn ôl. Roedd ganddo brofiad gwaith mewn gwaith manwerthu a ffatri ond mynegodd ddiddordeb mewn gweithio yn y sector lletygarwch. Yn ystod ei gyfnod ar y rhaglen, roedd Milan yn gallu bwrw golwg ar ba rolau oedd ar gael mewn gwahanol sectorau yn yr ardal leol. Roedd yn gallu creu CV cyfoes a dysgu am nifer o dechnegau cyfweld yr oedd yn gallu eu rhoi ar waith yn ystod ein sesiwn ffug gyfweliad. Yn ogystal, roedd yn gallu cael gwell dealltwriaeth o slipiau cyflog a chostau byw. 


Ar ôl cwblhau'r Rhaglen Llwybr Ieuenctid, cofrestrodd Milan gyda Gweithio Sir Gaerfyrddin a chafodd gymorth un-i-un gan ein mentor, Emma. Dechreuon nhw gyfarfod yn rheolaidd yng nghanolfan y Cyngor i drafod pa swyddi lletygarwch oedd ar gael yn yr ardal a pha oriau fyddai'n addas iddo. Cysylltodd Emma â'n Swyddog Cyswllt Cyflogaeth, Kristian, i ddod o hyd i gyflogwyr addas. Cysylltodd Kris â Ross, rheolwr yn Nandos, ac anfonodd CV Milan. O ganlyniad, gwahoddwyd Milan am shifft prawf a chafodd gynnig y swydd yn llwyddiannus. Roedd Milan wrth ei fodd gyda'r adborth a gafodd ac mae bellach yn gweithio 20 awr yr wythnos.  

Willow Daycare

Staff Willow Day care gyda CaraMae Willow Daycare, darparwr gofal plant yng Nghaerfyrddin, wedi ymrwymo ers tro i gynnig amgylchedd meithringar a diogel i blant. Gyda galw cynyddol am wasanaethau gofal plant o ansawdd uchel yn yr ardal, roedd y tîm yn Willow Daycare yn cydnabod y cyfle i dyfu. Mewn ymateb i'r potensial hwn, gwnaethant gais am grant twf gan Gyngor Sir Caerfyrddin a llwyddo. Cyflwynodd Steve, o'r tîm busnes a grantiau, Willow Daycare i Rebecca, un o'r Swyddogion Cyswllt â Chyflogwyr ar gyfer Gweithio Sir Gar, i gefnogi'r gwaith o gyflogi mwy o staff.

Trafododd Rebecca y gwahanol fathau o gefnogaeth y gallai Gweithio Sir Gar eu cynnig i'r busnes, gan gynnwys cyfle gwaith â thâl ac ad-daliadau ar gyfer costau'r Gwasanaeth Datgelu a Gwahardd. Mae cyfle gwaith â thâl yn caniatáu i'r busnes dderbyn ad-daliad am gyflog y gweithiwr ar isafswm cyflog. O ganlyniad i'r grant gan y Cyngor, a'r gefnogaeth gan Gweithio Sir Gar, llwyddodd Willow Daycare i gyflogi Cara (yn y llun) trwy leoliad gwaith â thâl am 12 wythnos. Ar ôl cwblhau ei lleoliad â thâl, mae Willow Daycare bellach wedi ei chyflogi fel prentis. 

Mae'r grant twf gan Gyngor Sir Caerfyrddin wedi bod yn allweddol wrth ehangu Willow Daycare. Mae mwy o staff wedi caniatáu i Willow Daycare ateb y galw cynyddol am wasanaethau tra'n cynnal y gofal personol y mae teuluoedd yng Nghaerfyrddin yn ei werthfawrogi. 

Mae Gweithio Sir Gar a thîm grantiau'r cyngor wedi bod yn gaffaeliad gwirioneddol i gefnogi twf a chynaliadwyedd fy musnes Meithrinfa Ddydd yng Nghaerfyrddin. Mae wedi rhoi cyfle cadarnhaol i ddarpar weithwyr ddod i gael profiad gwaith â thâl yn y Sector Gofal Plant. Mae hyn wedi eu galluogi i wneud penderfyniad gwybodus ynghylch ai gofal plant yw'r alwedigaeth ar eu cyfer nhw ac ar gyfer eu cyflogaeth a'u haddysg bellach yn y dyfodol i fod yn ymarferydd cymwysedig. Rwyf wedi mwynhau gweithio ochr yn ochr â'r tîm Ymgysylltu ac mae wedi bod yn wirioneddol wych cefnogi eraill i benderfynu ar lwybr gyrfa!"

– Bec, Willow Daycare

Stori Sylwia 

Sylwia gyda Emma

Pan gafodd Sylwia ei hatgyfeirio i Gweithio Sir Gar roedd hi wedi bod yn ddi-waith ers 6 blynedd. Roedd hi wedi bod yn magu ei phlant ac roedd hi bellach yn chwilio am waith a fyddai'n gweithio o gwmpas ei gofal plant. 


Pan gofrestrodd Sylwia ar gyfer y prosiect, cafodd ei chefnogi gan ein mentor Emma. Yn ystod eu cyfarfod cychwynnol, mynegodd Sylwia ei bod eisiau rôl a oedd yn barhaol ac yn cynnig incwm sefydlog. Dechreuon nhw chwilio am swydd a daeth Sylwia i'r penderfyniad mai'r rolau a fyddai'n gweddu orau iddi fyddai rôl cynorthwyydd addysgu neu arlwyo yng Nghyngor Sir Caerfyrddin. 


Er mwyn gwella ei CV, llwyddodd Gweithio Sir Gar i gefnogi Sylwia gyda chyllid i gwblhau nifer o gyrsiau. Cwblhaodd ei chymhwyster cynorthwyydd addysgu lefel 1, cymhwyster Cymorth Cyntaf, Cook24 a Care24. Drwy gydol ei hamser ar y prosiect, roedd Emma yn gallu cefnogi Sylwia i ddiweddaru ei CV a chwilio am swyddi'n rheolaidd, yn ogystal â rhoi lle diogel iddi drafod unrhyw bryderon a rhoi anogaeth pan fo angen.

 
O ganlyniad i'w gwaith caled a'r gefnogaeth gan Gweithio Sir Gar, mae Sylwia bellach yn gweithio fel cynorthwyydd arlwyo rhan-amser. Mae hi wrth ei bodd i fod yn ôl mewn cyflogaeth ac i fod wedi sicrhau swydd sy'n gweithio o gwmpas ei phlant. 

Stori David

Left – Paul Dyer (Site Manager ) Middle – David Right – Lee (Mentor)

Cyfeiriwyd David at Weithio Sir Gar o'r Ganolfan Waith i gael cymorth i fynd yn ôl i'r gwaith. Roedd David wedi bod heb waith am 6 blynedd ar ôl dioddef o faterion iechyd a llesiant. Roedd y materion hyn yn cyfyngu ar faint o waith corfforol yr oedd yn gallu ei wneud. O ganlyniad i hyn, roedd mewn trafferthion ariannol ac roedd yn ysu am ddod o hyd i waith i gael dau ben llinyn ynghyd.

Yn ystod ei gyfarfod cyntaf gyda’n mentor, Lee, buont yn trafod pa gymorth yr oedd David ei eisiau o’r prosiect. Gyda chefndir ym myd adeiladu, roedd eisiau cymorth i ennill sgiliau a chymwysterau yn y maes hwn. Buont yn trafod cyfleoedd gwaith a fyddai ar gael yn yr ardal ac yn llunio cynllun gweithredu i gynorthwyo David i gael hyfforddiant priodol. Yn sgil Gweithio Sir Gar, llwyddodd David i ddilyn cyrsiau i ennill trwydded tele-handler a cherdyn Cynllun Ardystio Sgiliau Adeiladu a llwyddodd i gael y ddau.

Mynychodd David gyfarfodydd chwilio am swydd rheolaidd gyda Lee. Yn ystod un o’r sesiynau hyn, cofrestrodd gydag Acorn Recruitment gyda’r gobaith o gael gwaith ar safle adeiladu Pentref Llesiant a Gwyddor Bywyd ym Mhentre Awel Llanelli.

>Bu'r mentor un-i-un a'r cyfarfodydd rheolaidd o gymorth i David feithrin ei hyder, gan roi sicrwydd iddo y byddai ganddo gefnogaeth barhaus drwy gydol ei daith gyda Gweithio Sir Gar. Roeddem yn gallu rhoi’r cymorth ariannol yr oedd ei angen ar David i gyflawni ei amcanion o ran swydd, yn ogystal â chymorth gyda sesiynau chwilio am swydd a diweddaru ei CV. O ganlyniad, llwyddodd David i gael swydd gydag Acorn Recruitment yn gweithio ar safle Pentre Awel yn Llanelli. Mae David bellach wedi bod mewn cyflogaeth ym Mhentre Awel ers 7 mis. Mae wrth ei fodd yn ei rôl ac mae'n ased i'r tîm ac yn weithiwr caled.

Stori Angel

Photo of Angel and Rhianon

Clywodd Angel am brosiect Gweithio Sir Gar am y tro cyntaf pan ddarllenodd un o'n straeon newyddion da. Penderfynodd ymweld â HWB y cyngor i holi a oeddem yn cynnig unrhyw gyrsiau a allai ei helpu i gael gwaith. Ar ôl trafod sut y gallai'r prosiect ddarparu cefnogaeth, cofrestrodd Angel gyda Gweithio Sir Gaerfyrddin a chafodd ei neilltuo i un o'n mentoriaid, Rhianon. 

Er iddo gael ei addysgu i lefel gradd, roedd Angel wedi cael nifer o swyddi a oedd yn waith â llaw, gan gynnwys pacio cig a gwaith fferm yn Nwyrain Ewrop. Yn ystod ei gyfnod fel gweithiwr cynhyrchu, cafodd ddyrchafiad a bu'n darparu sesiynau sefydlu i staff newydd. Roedd y sgiliau a ddysgodd yn y rôl hon wedi sbarduno ei ddiddordeb mewn archwilio swyddi yn y sector addysg a dechreuodd feddwl a fyddai'n bosibl dod yn gynorthwyydd addysgu.

Yn ystod cyfnod Angel ar y prosiect, cwblhaodd lawer o gyrsiau ar-lein a chafodd gefnogaeth i lunio CV. Aeth i sesiynau chwilio am swyddi wythnosol gyda Rhianon lle buont yn ymchwilio i ba asiantaethau addysgu oedd yn yr ardal leol. Roedd gan bob asiantaeth wahanol feini prawf, felly fe wnaethant dreulio amser yn gweithio ar y rhain i gael y canlyniad gorau posibl.

Yn y cyfamser, er mwyn gwella sgiliau Saesneg llafar ac ysgrifenedig Angel, cyflwynodd Rhianon ef i wahanol ddarpariaethau yn yr ardal leol. Gan fod gan Angel radd mewn theatr a ffilm, cyflwynodd Rhianon ef i Raglen Llysgenhadon Theatr y Ffwrnes  lle ymunodd fel gwirfoddolwr ac roedd ei rôl yn cynnwys cwrdd a chyfarch. Cyflwynodd Rhianon ef hefyd i The Good Shed lle cofrestrodd ar gwrs TGAU Saesneg. Fe wnaeth Angel fwynhau'r cwrs hwn yn fawr ac roedd ei hyder wedi cynyddu'n sylweddol. Gofynnwyd iddo hyd yn oed arwain rai o'r gwersi.

“Cyn gynted ag y cyrhaeddodd Angel fy nosbarth Saesneg, roedd yn amlwg ei fod yn benderfynol iawn o gyflawni ei nod o weithio ym myd addysg. Yr anhawster iddo, fel i lawer o fyfyrwyr o wledydd eraill, oedd nad oedd ganddo'r cymwysterau Prydeinig gofynnol.  Yn ffodus, cafodd gefnogaeth i ddod o hyd i The Goods Shed lle roeddem yn gallu ei helpu i symud ymlaen.

Yn wyrthiol, llwyddodd nid yn unig i gael gradd TGAU mewn Saesneg, ond enillodd radd A, sy'n hynod o brin i fyfyriwr nad yw'n siarad Saesneg fel iaith gyntaf: rhagorol!" - Caroline (Arweinydd Cwrs TGAU Saesneg).

O ganlyniad i'w ymroddiad a'i waith caled, cofrestrodd Angel gyda Prospero Teaching a chafodd leoliad 2 wythnos fel cynorthwyydd addysgu mewn ysgol gynradd leol. Yn dilyn hyn, cafodd gynnig lleoliad tymor hir mewn ysgol arall ac mae bellach wedi bod mewn cyflogaeth am dros 12 mis. Mae'n mwynhau ei rôl fel cynorthwyydd addysgu gymaint y mae am hyfforddi i fod yn athro.  

  

Stori Samantha

Samantha gyda staff o Coracle coaches

Cyfeiriwyd Samantha at Gweithio Sir Gaerfyrddin o'r ganolfan waith a chafodd ei pharu â'n mentor, Bethan. Yn ystod eu cyfarfod cyntaf, dysgodd Bethan fod gan Samantha drwydded HGV a'i bod yn chwilio am gymorth i ddod o hyd i swydd yrru. Fel mam sengl i blant bach, roedd yn bwysig ei bod yn cael swydd lle gallai weithio'r oriau roedd ar gael i weithio. Dechreuodd Samantha fynychu cyfarfodydd wythnosol gyda Bethan lle cafodd gymorth i chwilio am swydd a chymorth gyda'i CV.  

Yn y cyfamser, cysylltodd Bethan â'n Swyddog Cyswllt Cyflogaeth, Becca, i weld a oedd unrhyw fusnesau'n chwilio am staff oedd â sgiliau a chymwysterau Samantha. Cysylltodd Becca â Coracle Coaches, a ddywedodd wrthi fod ganddynt swydd a allai fod yn addas iddi. Ar ôl cwrdd, roedd y cwmni a Samantha yn hapus i fwrw ati, dim ond ei bod yn cael trwydded PSV. Er mwyn cefnogi Samantha a'r busnes, cynigiodd Gweithio Sir Gaerfyrddin ad-dalu i Coracle Coaches cost rhoi Samantha drwy'r prawf.

Llwyddodd Samantha i gael y drwydded a chafodd ddyddiad cychwyn yn fuan wedyn. Bellach mae wedi bod mewn gwaith ers dros flwyddyn a'i bwriad yw mynd ymlaen i wneud cwrs rheolwr.

“Ces fy nghyflwyno i Gweithio Sir Gaerfyrddin drwy'r Ganolfan Waith ar ôl cael dim llwyddiant yn dod o hyd i swydd HGV ar ôl pasio fy mhrawf. Gyda help staff Gweithio Sir Gaerfyrddin, fe ddaethon nhw o hyd i swydd i fi gyda Coracle Coaches. Ar ôl cael fy nghyfweliad a siarad â'r Cyflogwr, gyda chymorth Becca trefnwyd contract oedd yn ffitio o gwmpas fi a fy nheulu. Yna aethon ni ati i gael yr hyfforddiant PSV sydd ei angen i gyflawni'r swydd. Roedd y cymorth ges i gan yr holl staff heb ei ail, roedden nhw wastad pen arall y ffôn pan oedd eu hangen nhw arna' i, neu ar gael yn yr HWB i mi alw i'w gweld. Daeth ambell rwystr i gwrdd â ni wrth ddelio â chwmnïau allanol, ac rown i'n teimlo fel rhoi'r gorau iddi ar un adeg, ond fe gadwon nhw fi i fynd ac atgoffa fi pam rown i eisiau gwneud hyn. Roedd yn bleser gweithio gyda nhw a bydden i'n argymell eu help nhw i unrhyw un sy'n chwilio am waith.” ~Samantha

“Byth ers i Gweithio Sir Gaerfyrddin gysylltu â ni ynglŷn â Samantha, roedd gweithio gyda nhw'n syml ac yn hwylus.  Llwyddon ni i drefnu gwersi i Samantha, a oedd yn awyddus iawn i ddysgu ac yn frwdfrydig. Aeth y rhain yn dda iawn, ac o ganlyniad pasiodd ei holl brofion theori ac ymarferol yn ddidrafferth. Ers pasio, mae Samantha wedi setlo yn ei swydd newydd fel gyrrwr bws ysgol ac mae'n edrych fel pe bai'n mwynhau ei gwaith gyda ni. Bydden ni'n argymell Gweithio Sir Gaerfyrddin i fusnesau sydd am recriwtio staff.”  ~Coracle Coaches

Stori Nataliia

Nataliia gyda Bethan o Carmarthenshire working

“Pan symudais i'r DU ar fy mhen fy hun gyda fy nhri plentyn, doedd gen i ddim cysylltiadau proffesiynol, dim profiad gwaith lleol, a dim hyder. Fy her fwyaf oedd yr iaith—roeddwn i'n poeni nad oedd fy Saesneg yn ddigon da i gystadlu yn y farchnad swyddi. Roedd gwahaniaethau diwylliannol mewn dulliau gwaith a phrosesau cyflogi hefyd yn ymddangos yn anodd eu deall.

Rhoddodd Bethan, mentor Gweithio Sir Gâr a fu’n gweithio gyda mi, gefnogaeth anhygoel i mi. Yn gyntaf, cafodd fy CV ei rannu gydag asiantaethau, a chynyddodd fy siawns o ddod o hyd i swydd. Yn ail, roeddwn i'n gallu mynychu Ffair Swyddi a siarad yn uniongyrchol â chyflogwyr. Ond y peth pwysicaf—fe wnes i fagu hyder.

Daeth cyfarfodydd wythnosol gyda Bethan yn lle diogel lle gallwn i rannu fy llwyddiannau a fy anawsterau, cael cyngor defnyddiol, a theimlo fy mod yn cael fy nghefnogi. Fe wnaeth hyn fy helpu i wynebu fy ofnau a chredu y gallwn i adeiladu gyrfa mewn gwlad newydd.

Heddiw, rwy'n gweithio fel Rheolwr Cynnyrch mewn cwmni technoleg ariannol newydd sy'n tyfu'n gyflym ac yn ehangu yn y DU a'r UE. Mae'r amgylchedd deinamig ac uchelgeisiol hwn yn lle perffaith ar gyfer fy nhwf proffesiynol.

Mae'r gefnogaeth a gefais wedi fy ysbrydoli i osod nodau newydd. Mae'r DU wedi rhoi diogelwch i mi a fy mhlant, a nawr rwyf am roi rhywbeth yn ôl trwy ddefnyddio fy sgiliau a fy mhrofiad. Rwy'n ystyried dechrau fy sefydliad fy hun i gyflwyno technoleg fodern i'r sector elusennau, gan helpu sefydliadau nad ydynt yn gwneud elw i ddod yn fwy effeithiol.

Mae'r daith hon wedi dangos i mi fod unrhyw beth yn bosibl pan fydd gennych chi bobl sy'n credu ynoch chi ac yn barod i helpu.”

Llwyddiant drwy'r Rhaglen Llwybr Ieuenctid - Stori JC

Cafodd JC eu cyfeirio at ein Rhaglen Llwybr Ieuenctid gan y ganolfan waith. Mae'r rhaglen yn cefnogi'r rheiny rhwng 16 a 19 oed i feithrin hyder a gwella eu sgiliau cyflogadwyedd. Tra ar y rhaglen, llwyddodd JC i ennill gwell dealltwriaeth o strwythuro CV, paratoi ar gyfer cyfweliadau, slipiau cyflog, a chostau byw. Ar ddiwedd y rhaglen, cymerodd JC ran yn ein sesiwn cyfweliad ffug, ac roedd yn amlwg bod eu hyder wedi cynyddu'n sylweddol.

Ar ôl cwblhau'r rhaglen, cafodd JC eu cofrestru gyda Gweithio Sir Gâr a'u neilltuo i'n mentor, Lee. Dywedodd JC, er nad oedden nhw erioed wedi gweithio, fod ganddyn nhw rywfaint o brofiad ymarferol mewn mecaneg a dealltwriaeth gref o systemau modurol. Roedd gan JC ddiddordeb mewn swydd yn gwerthu ceir neu ym maes gwasanaeth cwsmeriaid. Eu nod hirdymor oedd mynd yn ôl i'r coleg i astudio cwrs Rheoli Busnes ond yn gyntaf roedden nhw eisiau rhywfaint o brofiad gwaith. Lluniodd Lee gynllun gweithredu i helpu JC i gael cyflogaeth. Dechreuon nhw gwrdd yn rheolaidd, a buodd Lee yn helpu JC i chwilio am swyddi a diweddaru eu CV. Fe wnaeth Kristian, un o'n Swyddogion Cyswllt Cyflogaeth, annog JC i fynd i ffair swyddi lle bydden nhw'n cael cyfle i drafod swyddi gwag gyda chyflogwyr lleol. Yn y ffair swyddi, siaradodd JC â chynrychiolydd o Park Dean Resort a oedd yn hysbysebu eu rolau lletygarwch. Ar ôl trafod gwnaeth JC gais am y swydd a chafodd wahoddiad i gyfweliad. Gan ddefnyddio'r sgiliau roedden nhw wedi'u dysgu ar y Rhaglen Llwybr Ieuenctid, cafodd JC gyfweliad gwych a llwyddodd i gael y swydd. Mae JC yn mwynhau'r swydd yn Park Dean yn fawr ac yn edrych ymlaen at y cyfleoedd byddan nhw'n eu cael ar ôl cwblhau cwrs Rheoli Busnes.

Stori MJ

Llun of Addysg Seren Education a Rebecca

Daeth MJ at sylw Gweithio Sir Gâr gyntaf yn ein Ffair Swyddi ym mis Mawrth 2024. Roedden nhw wedi bod yn chwilio am waith ers mis Tachwedd ond heb lwyddo. Roedd ein digwyddiad yn gyfle i MJ weld pa swyddi oedd ar gael yn Sir Gaerfyrddin a thrafod pob rôl gyda chyflogwyr, wyneb yn wyneb. Wrth wneud hynny daeth MJ ar draws stondin Addysg Seren. Asiantaeth recriwtio athrawon yw Addysg Seren sy'n cynnig gwasanaeth cyflenwi ar gyfer ysgolion cynradd, uwchradd ac Anghenion Addysgol Arbennig.  Ar ôl trafod pa swyddi oedd ar gael, roedd diddordeb gan MJ mewn cofrestru. Toc wedi'r digwyddiad, cafodd MJ wahoddiad i'w Swyddfa yng Nghaerfyrddin i gofrestru fel cynorthwyydd addysgu. Rai dyddiau ar ôl cwblhau'r holl wiriadau, cafodd MJ gynnig lleoliad mewn Ysgol Gynradd leol. Roedd y swydd yma'n rhoi'r hyblygrwydd roedd ei angen ar MJ, ac maen nhw mewn gwaith rheolaidd erbyn hyn.

Adborth gan MJ: 

"Dwi'n anfon e-bost i roi gwybod i chi pa mor llwyddiannus oedd ffair swyddi'r Gwanwyn i fi ar y 7fed o Fawrth. Fe ges i waith gydag Addysg Seren o achos eich digwyddiad chi. Ro'n i wedi bod yn chwilio am swydd ers Tachwedd y llynedd, heb unrhyw lwc, ac ro'n i'n colli gobaith a dweud y gwir. Fydden i erioed wedi meddwl chwilio am waith gydag Addysg Seren felly dwi'n ddiolchgar iawn bo fi wedi mynd i'ch digwyddiad chi y diwrnod hwnnw”.

Adborth gan Addysg Seren:

“Fe wnaethon ni gwrdd â (MJ) mewn ffair swyddi yng Nghaerfyrddin, ac roedd yn amlwg bod (MJ) yn anobeithio ynghylch cael unrhyw fath o swydd, heb sôn am un roedden nhw'n dymuno ei gwneud.  Ar ôl treulio amser gyda (MJ) yn esbonio beth mae ein cwmni yn ei wneud a sut gallwn ni helpu nhw i gael gwaith fel cynorthwyydd cyflenwi,  gwrandawodd (MJ) arnon ni ac roedden nhw'n awyddus i wybod sut oedd ymuno â ni. Yn fuan iawn ar ôl y ffair swyddi, daeth (MJ) i'n swyddfa yng Nghaerfyrddin a chofrestru gyda ni. Ar ôl i'r holl wiriadau cydymffurfio gael eu gwneud, roedd (MJ) yn barod ar gyfer gwaith, a diwrnod neu ddau yn ddiweddarach cafodd (MJ) gynnig eu lleoliad cyntaf mewn ysgol gynradd leol. Ers hynny mae (MJ) wedi bod yn gweithio bron bob dydd, ar wahân i'r diwrnodau roedden nhw wedi dweud wrthon ni na allen nhw weithio, ac mae'r ysgol yn aml yn gofyn iddyn nhw ddod nôl. 

Rydyn ni wedi sylwi ar newid positif iawn yn (MJ) ers cwrdd â nhw am y tro cyntaf. Mae'n amlwg bod eu profiad gyda ni wedi rhoi hyder a mwynhad iddyn nhw. Mae'r adborth rydyn ni'n ei gael gan ysgol ein cleient yn bositif bob amser. Rydyn ni mor falch o gael bod yn rhan o'u taith i gyflogaeth”.

Stori SC

Darllenodd SC am Weithio Sir Gâr ar-lein a gwnaeth hunanatgyfeiriad er mwyn cael cymorth i fynd i'r gwaith. Roedd yn newydd i'r wlad ac yn teimlo'n ynysig gan nad oedd yn adnabod llawer o bobl yn yr ardal. Parwyd SC â'n mentor, Emma. 

Trefnodd Emma fod SC yn cwrdd â hi yn Hwb y cyngor i drafod pa gymorth oedd ei angen ar SC i gael gwaith a pha rolau fyddai'n fwyaf addas. Roedd SC yn agored iawn i wneud cais am rolau mewn gwahanol sectorau. Roedd Emma yn gallu gweld nad oedd gan SC lawer o hyder, felly dechreuodd gyfarfod yn rheolaidd i roi cymorth i chwilio am swyddi ac ysgrifennu CV. Yn ogystal, penderfynodd Emma roi SC ar gwrs magu hyder a drefnwyd gan Weithio Sir Gâr.

Er bod mynychu'r cwrs wedi golygu bod SC yn camu allan o fan cyfforddus, roedd yn ei chael yn fuddiol dros ben ac yn meddwl bod cwrdd â phobl newydd yn yr ardal yn wych. Gwnaeth yr hyfforddiant sbarduno SC i wneud cais am ragor o swyddi mewn gwahanol sectorau. Yn sgil hyn, cafodd wahoddiad am gyfweliad ar gyfer rôl yn y sector gofal a llwyddodd i gael y swydd. Gyda chefnogaeth Emma a'r hyder a fagodd yn sgil y prosiect, bellach cyflogir SC fel gofalwr amser llawn mewn cartref gofal lleol. 

Stori Lewis 

Llun o Lewis, John a Zara

Cafodd Lewis ei atgyfeirio at Gweithio Sir Gar gan Mencap, sefydliad sy'n cefnogi unigolion ag anableddau dysgu.

Dangosodd Lewis ddiddordeb mewn cael gwaith a chafodd ei baru â John, un o fentoriaid Gweithio Sir Gar. Ar y cychwyn roedd yn amlwg bod Lewis yn brin o hyder, yn enwedig wrth gyflawni tasgau nad oedd wedi arfer â nhw. Roedd yn gweld cyfarfodydd wythnosol wyneb yn wyneb yn anodd, felly newidiodd John ei ffordd a dechrau sgwrsio dros y ffôn yn lle hynny - rhywbeth a weithiodd yn dda i Lewis.

I ddatblygu sgiliau personol a CV Lewis, cynigiodd John le iddo ar gwrs Cymorth Cyntaf Brys yn y Gwaith. Cytunodd Lewis, ond bu'n rhaid dwyn perswâd arno gan y byddai'n mynychu'r cwrs gydag unigolion nad oedd yn eu hadnabod. Ychydig ddyddiau cyn y cwrs, cysylltodd John â Lewis i egluro trefn y dydd. Roedd yn glir ar y ffôn fod Lewis yn ansicr iawn ac yn poeni llawer am fynd ar y cwrs gan ei fod ar ffurf grŵp. Yn fuan wedyn, cafodd John alwad gan Zara, mentor Mencap Lewis, yn egluro ei fod yn ailfeddwl ynghylch mynychu'r cwrs. Er mwyn helpu i leddfu gofidiau Lewis, cytunodd John a Zara i gwrdd ag ef ar ddiwrnod y cwrs i roi cefnogaeth pan fyddai Lewis yn teimlo bod ei hangen arno. Unwaith oedd Lewis yn gyfforddus, llwyddodd i gwblhau rhannau o'r cwrs yn annibynnol.

Trwy ei ddycnwch a chefnogaeth John a Zara, daeth Lewis i ben â goresgyn ei bryderon am fod yn rhan o grŵp, ac roedd gwên ar ei wyneb ar ddiwedd y dydd gan fod cymhwyster newydd ganddo i'w ychwanegu at ei CV.

 

Stori MR

Cyfeiriodd Gyrfa Cymru MR at Gweithio Sir Gâr. Pan oedd MR wedi cofrestru gyda ni, roedd eisoes yn gweithio 5 awr yr wythnos fel goruchwyliwr amser cinio ond roedd am gynyddu nifer yr oriau. 


Parwyd MR â'n mentor, Emma. Er ar y dechrau roedd MR yn poeni am fynychu'r cyfarfodydd, adeiladodd MR berthynas wych gyda Bethan a dangosodd ymrwymiad i'r prosiect, gan gyfarfod yn rheolaidd yn yr hwb, cymryd rhan ym mhob cyfarfod a chymryd rhan yn ein sesiynau grŵp i chwilio am swydd. 


Roedd MR eisiau swydd a oedd yn cyd-fynd ag anghenion gofal plant. Tynnodd Bethan sylw at wahanol rolau sydd ar gael o fewn oriau ysgol a fyddai'n cefnogi hyn. Er mwyn gwella CV MR,  llwyddodd Gweithio Sir Gâr i ariannu MR i fynd ar gwrs hylendid bwyd.  Yn ogystal, aeth MR ati'n annibynnol i gwblhau nifer o gyrsiau gyda Learn Direct. 


Yn ystod sesiwn chwilio am swydd, cefnogodd Bethan MR i lenwi ceisiadau am swyddi ar gyfer rolau mewn ysgolion. O ganlyniad i waith caled MR a chefnogaeth Bethan, llwyddodd MR i gael cyflogaeth ac mae bellach yn gweithio dros 20 awr fel goruchwyliwr brecwast, cynorthwyydd amser cinio a chynorthwyydd ar ôl ysgol.

Stori Llwyddiant Aled

Aled and John

Cofrestrodd Aled gyda Gweithio Sir Gar ar ôl colli ei swydd. Cafodd ei baru gyda'n Mentor, John, a luniodd gynllun i'w helpu i ddychwelyd i gyflogaeth. Roedd Aled yn mwynhau gweithio ac yn benderfynol o gael gwaith unwaith eto. Gan ei fod yn barod i wneud cais am swyddi mewn gwahanol sectorau, cafodd help llaw gan John i lunio CV penodol ar gyfer pob swydd. I ychwanegu at CV Aled, roedd John wedi ei gofrestru i wneud cwrs Cymorth Cyntaf yn y Gwaith, a llwyddodd i'w gwblhau. Aeth Aled ati'n eiddgar i gwblhau nifer o gyrsiau gyda Learn Direct ym maes diogelwch bwyd, TG, iechyd a diogelwch, codi a chario a mwy.

Dangosodd Aled ymrwymiad mawr i'r prosiect. Cyfarfu'n rheolaidd â John yn yr hwb, cymerodd ran yn ein sesiynau chwilio am swydd wythnosol, a mynychodd ein ffeiriau swyddi lle cafodd gyfle i siarad â chyflogwyr oedd â swyddi gwag yn Sir Gaerfyrddin. Yn ystod un o'n sesiynau chwilio am swydd, gwelodd Aled fod swydd wedi codi yn ei hen adran. Gyda chefnogaeth John, gwnaeth Aled gais am y swydd a chafodd wahoddiad i gyfweliad. Llwyddodd i gael y swydd ac mae bellach wrth ei fodd ei fod nôl yn gweithio'n amser llawn.

Hwb