Llwybr Dyffryn Tywi
Mae llwybr cerdded a beicio nodedig 13 milltir o hyd trwy Ddyffryn Tywi wedi cael ei agor yn swyddogol, gan nodi carreg filltir bwysig o ran teithio cynaliadwy a thwristiaeth yn Sir Gâr.
Mae Llwybr Dyffryn Tywi, sy'n dilyn llwybr hen reilffordd a gaewyd ym 1963, wedi cael ei gyflawni drwy fuddsoddiad o £16.7 miliwn gan Gronfa Ffyniant Bro Llywodraeth y DU, ochr yn ochr â chyllid a chymorth gan Gyngor Sir Caerfyrddin a chontractwyr rhanbarthol allweddol.
Mae'r llwybr yn dilyn llawer o'r hen linell reilffordd, sy'n arbennig o addas ar gyfer prosiect o'r fath, gan gynnig llwybrau gwastad, sydd eisoes wedi eu sefydlu y gellir eu haddasu'n hawdd ar gyfer cerdded, beicio ac olwynio. Mae'r llwybr yn cynnig cysylltiad uniongyrchol, di-draffig a pharhaus rhwng cymunedau, gan gynnig dewis amgen newydd, carbon isel ar gyfer teithio a hamdden.
Bydd Llwybr Dyffryn Tywi yn gyfleuster newydd hir-ddisgwyliedig i breswylwyr ac ymwelwyr â Sir Gaerfyrddin sy'n cefnogi trafnidiaeth gynaliadwy, hyrwyddo ffyrdd iachach o fyw, ac ysgogi'r twristiaeth leol a'r economi wledig. Mae swyddogion y cyngor yn gweithio gyda darparwyr hamdden, busnesau lletygarwch, a threfnwyr digwyddiadau i wneud y mwyaf o effaith y llwybr a'i gysylltu â llwybrau di-draffig eraill ledled y sir.
Mae'r llwybr yn cynnig lle diogel, hygyrch a hardd i feicwyr, cerddwyr, teuluoedd ac ymwelwyr, gan eu tywys trwy rai o dirweddau mwyaf ysblennydd Sir Gâr. Ar hyd y ffordd, gall defnyddwyr fwynhau golygfeydd eang ar draws Dyffryn Tywi, gan gynnwys Tŵr Paxton, Castell Dryslwyn a Chastell Dinefwr, sydd wedi'u lleoli yng nghanol cefn gwlad dramatig sy'n llawn bryniau a phantiau. Mae harddwch i'w weld ar y llwybr trwy gydol y flwyddyn wrth i'r dirwedd newid yn gyson trwy gydol y tymhorau.
Mae'r ardal gyfagos yn cynnig cyfoeth o atyniadau i ymwelwyr, gydag Amgueddfa Caerfyrddin yn Abergwili a Pharc yr Esgob yn lle heddychlon sy'n agos at y llwybr, yn ogystal â rhai o erddi enwocaf Cymru, gan gynnwys Gardd Fotaneg Genedlaethol Cymru, Aberglasne a Gelli Aur.
Gall y rhai sy'n hoff o fwyd fwynhau mannau lleol ardderchog i gael bwyd, gan gynnwys Wrights Food Emporium, Stacey's Kitchen ac amrywiaeth o gaffis annibynnol a lleoedd i fwyta. Â threfi marchnad bywiog Caerfyrddin a Llandeilo ar bob pen o'r llwybr, mae gan ymwelwyr gyfleoedd gwych i gychwyn neu orffen eu taith drwy siopa a chael ychydig o ddiwylliant a lletygarwch lleol.
Mae'r llwybr yn gweithredu fel coridor diwylliannol a hamdden allweddol. Mae'n annog pobl i aros yn hirach ac i ymweld yn fynych, gan gefnogi'r economi ymwelwyr leol yn uniongyrchol, a sicrhau bod canol trefi, busnesau gwledig a mentrau cymunedol fel ei gilydd yn profi'r buddion economaidd.
