Cymorth i deuluoedd geni

Rydyn ni'n deall y gall mabwysiadu achosi amrywiaeth eang o emosiynau, cwestiynau ac ansicrwydd. Ein rôl ni yw sicrhau eich bod yn cael eich trin â pharch, a'ch bod yn cael gwybodaeth a chymorth drwy gydol y broses.

Byddwn ni'n eich helpu i baratoi ar gyfer yr hyn y mae mabwysiadu yn ei olygu, yn ymarferol ac yn emosiynol.

Y cymorth sydd ar gael 

Rydyn ni'n cynnig cyngor a chwnsela i rieni geni, neiniau a theidiau, brodyr a chwiorydd ac aelodau o'r teulu estynedig y mae mabwysiadu yn effeithio arnyn nhw.

Byddwn ni'n esbonio pob cam o'r broses fabwysiadu yn glir, fel eich bod chi'n deall beth sy'n digwydd a pham. Gallwn ni eich cefnogi gyda Gwaith Hanes Bywyd a Llythyrau Bywyd Diweddarach, gan eich helpu i rannu atgofion a gwybodaeth bwysig ar gyfer dyfodol eich plentyn. Rydyn ni hefyd yn darparu arweiniad ynghylch galar, colled a rheoli newid, ochr yn ochr â chymorth emosiynol parhaus os oes ei angen arnoch chi.

Nid oes rhaid i chi lywio hyn ar eich pen eich hun.

Cadw mewn cysylltiad ar ôl mabwysiadu

Mewn llawer o achosion mabwysiadu, cytunir ar ryw fath o gyswllt parhaus rhwng y teulu sy'n mabwysiadu a'r teulu geni. Gall hyn gynnwys cyswllt uniongyrchol, cyswllt anuniongyrchol (blwch post), neu weithiau cyfuniad o'r ddau, yn dibynnu ar yr hyn sydd er lles pennaf y plentyn yn ôl asesiad.

Cyswllt yn oedolyn

Pan fydd person a fabwysiadwyd yn cyrraedd 18 oed, mae ganddo hawl i weld ei gofnodion a phenderfynu a yw'n dymuno archwilio cyswllt.

Os ydych chi'n rhiant geni, brawd neu chwaer, nain neu daid, neu'n aelod o deulu estynedig person a fabwysiadwyd ac yr hoffech archwilio'r posibilrwydd o gysylltu unwaith y bydd yn oedolyn, gallwn ni gynnig cyngor ac arweiniad.

Rydyn ni'n darparu gwasanaethau chwilio a chyfryngu, er y gall yr amserau aros weithiau fod yn hir. Gallwn ni hefyd eich cyfeirio at sefydliadau gwirfoddol ac elusennau arbenigol sy'n cynnig gwasanaethau tebyg, er y gall y rhain godi ffi.