Newyddion a Digwyddiadau

Drwy'r drysau: Gwrando ar bobl ifanc i wella presenoldeb mewn ysgolion

Mae ein Hadran Addysg wedi bod yn gweithio gyda'r Youth Work Lab a Promo Cymru ar 'Drwy'r Drysau', sef prosiect ymchwil i ddeall presenoldeb mewn ysgolion yn well trwy leisiau a phrofiadau byw plant a phobl ifanc. 

Roedd dros 200 o bobl ifanc o bob cwr o Sir Gaerfyrddin yn rhan o'r prosiect, gan gynnwys rhai sy'n mynychu ysgolion prif ffrwd, darpariaeth amgen, a rhai mae eu presenoldeb wedi bod yn llai cyson. Yn hytrach na chanolbwyntio ar ddata presenoldeb yn unig, rhoddai'r ymchwil sylw i'r hyn sy'n helpu pobl ifanc i ymgysylltu â'r ysgol ac i'r hyn a all ei gwneud yn anoddach mynychu. 

Beth ddywedodd y bobl ifanc wrthon ni? 

Mae'r canfyddiadau'n dangos bod cysylltiad agos rhwng presenoldeb a'r profiad gaiff plant a phobl ifanc yn yr ysgol. 
Siaradai'r bobl ifanc am bwysigrwydd:

• • Teimlo eu bod yn cael eu croesawu, eu gwerthfawrogi a'u parchu
• • Oedolion maent yn gallu ymddiried ynddynt sy'n gwrando ac yn deall 
• • Cyfeillgarwch cadarnhaol ac ymdeimlad o berthyn
• • Amgylcheddau diogel a chefnogol 
• • Dysgu sy'n teimlo'n berthnasol ac yn ddifyr

Tynnodd y bobl ifanc sylw hefyd at y rhwystrau sy'n gallu effeithio ar bresenoldeb, gan gynnwys gorbryder, pwysau cymdeithasol, teimlo diffyg cysylltiad, systemau anhyblyg a phrofiadau lle maent yn teimlo nad oes neb yn eu clywed. 

Neges allweddol o'r ymchwil yw bod presenoldeb yn golygu mwy na bod yn bresennol yn yr ysgol yn unig. Mae perthnasoedd, llesiant, cynhwysiant a phrofiadau bob dydd plant a phobl ifanc yn dylanwadu ar bresenoldeb. 

O "Ddrysau caeedig" i "Ddrysau agored"

Mae'r dulliau a'r adroddiadau ymchwil yn cyflwyno'r syniad o "ddrysau caeedig" a "drysau agored". 
Drysau Agored yw'r profiadau, y perthnasoedd a'r gefnogaeth sy'n annog pobl ifanc i fynychu'r ysgol ac i ddysgu. 
Drysau Caeedig yw'r heriau a'r rhwystrau sy'n gallu gwneud mynychu yn anoddach. 
Mae deall y ddau yn helpu ysgolion, teuluoedd a gwasanaethau i weithio gyda'i gilydd i greu amodau y gall rhagor o bobl ifanc ffynnu ynddynt. 

Edrych i’r dyfodol

Mae'r ymchwil yn nodi nifer o argymhellion sy'n canolbwyntio ar gryfhau ymdeimlad o berthyn, cyfranogiad, llesiant ac arferion cynhwysol ar draws addysg. Yn ganolog i'r argymhellion hyn mae pwysigrwydd parhau i wrando ar blant a phobl ifanc, a defnyddio eu profiadau i lunio ymagweddau at bresenoldeb ac ymgysylltu yn y dyfodol. 

Bydd y canfyddiadau'n helpu i lywio gwaith parhaus ledled Sir Gaerfyrddin, gan gefnogi'r gwaith o ddatblygu blaenoriaethau presenoldeb, llesiant, cynhwysiant a chyfranogiad ar draws addysg a gwasanaethau partner. 

Yr adroddiadau: 

Mae'r adroddiadau ymchwil isod yn bwrw golwg fanylach ar y profiadau a rannwyd gan bobl ifanc a'r cyfleoedd a nodwyd i gryfhau presenoldeb, ymgysylltu a llesiant ar draws Sir Gaerfyrddin:

Adroddiad Ymchwil Llawn
Crynodeb Gweithredol 
Ffeithlun

Trwy wrando'n ofalus ar bobl ifanc, gallwn barhau i adeiladu cymunedau ysgol lle mae pob dysgwr yn teimlo ei fod yn perthyn, fod rhywun yn gwrando, a'i fod yn cael cefnogaeth i lwyddo. 

• Lleoliad: