Cymorth i brynu tŷ a Prynu Cartref Sir Gaerfyrddin

Ar hyn o bryd mae gennym gynhyrchion perchentyaeth cost isel ar gael i bobl gymwys i'w helpu i gael mynediad at berchentyaeth pan fo prisiau'r farchnad agored ychydig allan o gyrraedd.

Mae Cynllun Prynu Cartref Sir Gaerfyrddin yn helpu aelwydydd cymwys i brynu cartref addas ar y farchnad agored, na allent ei fforddio heb gymorth. Mae hyn yn cael ei wneud trwy fenthyciad ecwiti sy'n cael ei dalu'n ôl pan fydd y cartref yn cael ei werthu. Gellir gweld rhagor o wybodaeth am y cynllun hwn, gan gynnwys meini prawf cymhwysedd a sut i wneud cais ar tudalen Prynu Cartref Sir Gaerfyrddin.

Yn ogystal â’r cynllun Prynu Cartref Sir Gaerfyrddin gall pobl gymwys hefyd brynu cartref, sydd newydd ei adeiladu, gan ddatblygwr neu gan y perchennog presennol pan fyddant yn cael eu gwerthu yn nes ymlaen. Gwneir hyn trwy bennu'r pris gwerthu ar gyfradd ostyngol yn y gwerthiant cyntaf a'r holl werthiannau yn y dyfodol. Gweler manylion y cynllun hwn isod.

Cartrefi fforddiadwy yw anheddau sy'n cael eu gwerthu am lai na gwerth y farchnad agored drwy opsiwn Perchnogaeth Cartref Cost Isel. Mae hyn yn sicrhau eu bod yn fforddiadwy i bobl gymwys nawr ac yn y dyfodol.

Mae'n bosibl y gallwn ni eich helpu os bydd y canlynol yn berthnasol:

• Gallwch chi brofi y gallwch chi gael morgais a bod gennych arian ar gyfer blaendal a ffioedd cyfreithiol. (Bydd y blaendal sydd ei angen arnoch yn dibynnu ar feini prawf benthyg darparwr eich morgais.)
• Mae cyfanswm incwm eich aelwyd cyn tynnu treth yn llai na thraean gwerth y tŷ ar y farchnad agored.
• Rydych yn byw, neu’n gweithio’n amser llawn, yn Sir Gaerfyrddin, neu mae gennych gysylltiad lleol hir-sefydledig â Sir Gaerfyrddin, er enghraifft teulu agos yn yr ardal.

Byddwn yn rhoi blaenoriaeth i denantiaid y Cyngor a thenantiaid cymdeithasau tai yn Sir Gaerfyrddin. Ni fyddwn yn eich ystyried os ydych:

• ar hyn o bryd yn berchen, ar eich pen eich hun neu ar y cyd â rhywun arall, ar dŷ arall, oni bai na allwch fyw yno (er enghraifft, ar ôl tor-perthynas);
• yn gwrthod rhoi manylion eich incwm a'ch cynilon i ni; neu
• yn prynu ag arian parod.

Ar ôl i chi gofrestru gyda ni ar gyfer tŷ fforddiadwy, gallwch gael negeseuon e-bost ynghylch tai sydd ar werth. Hefyd gallwch weld y tai sydd ar werth ar ein gwefan ac ar wefan Canfod Cartref. Os gwelwch dŷ yr hoffech ei brynu, bydd angen i chi sicrhau bod manylion eich cais yn gyfredol o ran y canlynol:

• eich incwm;
• eich cynilon;
• aelodau o'r teulu sy'n symud gyda chi, gan gynnwys p'un a fyddwch yn prynu'r tŷ gyda rhywun arall.

Hefyd bydd angen i ni gael tystysgrif morgais gan fanc neu gymdeithas adeiladu sy'n cadarnhau y rhoddir morgais i chi am y swm y mae angen i chi ei gael i brynu'r tŷ.

Os ydych yn gweld tŷ yr hoffech ei brynu byddwch yn mynegi eich diddordeb yn y tŷ drwy wneud 'cynnig'. Nid oes gan gynnig unrhyw werth ariannol. Mae'n golygu dangos bod diddordeb gennych yn y tŷ. Byddwn yn asesu eich cynnig i brynu tŷ fforddiadwy trwy ddefnyddio'r meini prawf yn ein Polisi Tai Fforddiadwy.

Os byddwch yn cael eich enwebu i brynu tŷ fforddiadwy, byddwn ni'n gofyn i chi lenwi datganiad statudol. Datganiad ffurfiol yw hwn, wedi'i lofnodi ym mhresenoldeb comisiynydd llwon, (mae hwn yn rhywun, fel cyfreithiwr, sydd wedi'i awdurdodi i wirio llwon a dogfennau cyfreithiol eraill) sy'n cadarnhau bod y wybodaeth rydych wedi'i rhoi i ni yn wir. Os ydych chi'n dweud celwydd mewn datganiad statudol, efallai y bydd hyn yn drosedd. Os oes gennym fwy nag un person sydd eisiau prynu cartref, darperir rhestr fer i berchennog / datblygwr y cartref yn unol â'n Polisi Cartrefi Fforddiadwy.

Tai ar werth

Prynu Cartref Sir Gaerfyrddin

Cofrestrwch i brynu tŷ fforddiadwy