Amgueddfa Cyflymder
Marsh Road, Pentywyn, SA33 4NY

Mae’r adeilad yn hollol newydd ac agorodd yr Amgueddfa i’r cyhoedd am y tro cyntaf ym mis Mai 2023.

Mae traeth Pentywyn wedi bod yn gartref i ymdrechion i dorri'r record cyflymder ar y tir ers bron i ganrif. Mae Sir Malcolm Campbell, J.G.  Parry-Thomas ac, yn fwy diweddar, Idris Elba a Zef Eisenberg, i gyd wedi gosod recordiau ar y traeth enwog hwn.

Mae'r Amgueddfa Cyflymder  yn adlewyrchu'r hanes hwn yn ei themâu o ryngweithio a chynaliadwyedd. Mae arddangosfeydd wedi’u cynllunio i fod yn hwyl ac yn ddeniadol i’r teulu cyfan ac yn cynnwys profiad fideo 4D o gar rasio chwedlonol Parry-Thomas, Babs, yn gyrru’n gyflym ar draws y traeth. O ystyried goblygiadau amgylcheddol moduro, mae’r adeilad ei hun wedi’i ddylunio i fod yn effeithlon iawn ac i leihau allyriadau carbon, yn unol â nod yr awdurdod lleol i ddod yn garbon niwtral erbyn 2030.

Ceir hefyd gipolwg helaeth ar wyddoniaeth cyflymder. Mae arddangosion rhyngweithiol yn annog ymwelwyr i weld y peirianneg y tu ôl i'r peiriannau ac i wybod pam mae tywod Pentywyn wedi'i siapio'n unigryw ar gyfer rasio. Tra bod yr arddangosfa arbennig gyntaf, a grëwyd mewn cydweithrediad â myfyrwyr Dylunio Modurol Prifysgol Cymru Y Drindod Dewi Sant, yn cyflwyno modelau o geir cysyniadol  ac yn dychmygu beth allai trafnidiaeth ddod yn y dyfodol.

Parcio: Oes. Mae mannau gwefru cerbydau trydan hefyd ar gael ar y safle.

Arlwyo: Oes. Mae'r ystafell ddigwyddiadau ar lawr cyntaf yr Amgueddfa yn berffaith ar gyfer arlwyo prydau ac yn cynnwys cegin fach os oes angen. Mae lle i hyd at 45 o bobl eistedd a hyd at 60 sefyll.

Cyfyngiadau ffilmio: Mae'n bosibl y gellid ffilmio ar unrhyw ddiwrnodau o'r wythnos os rhoddir digon o rybudd. Nid oes angen cyfyngu ffilmio i ddiwrnodau pan fydd yr eiddo ar agor neu ar gau.

Fodd bynnag, pe bai angen ffilmio ar ddiwrnodau pan fyddai'r eiddo fel arfer ar agor i'r cyhoedd, efallai y byddai angen cau'r Amgueddfa er hwylustod y criw ffilmio. Felly byddai angen digolledu'r eiddo am unrhyw golled o ran enillion posibl ac amser staff ychwanegol sydd ei angen i fonitro/diogelu casgliadau neu fod yn bwyntiau cyswllt i'r tîm ffilmio.

Efallai y bydd angen rhoi mesurau lliniaru ar waith i ddiogelu gwrthrychau’r casgliadau. Gall rhai gwrthrychau, megis paentiadau, fod yn sensitif i olau a bydd angen eu tynnu oddi ar yr arddangosfa neu eu gorchuddio. Efallai y bydd angen symud gwrthrychau eraill i osgoi difrod/llwch.

Dim ond mewn ambell ystafell yn yr eiddo y gellid bwyta neu yfed fel arfer i osgoi niwed i gasgliadau.

Mae digon o le i barcio ar y safle, ond efallai y bydd angen gwneud trefniadau eraill ar gyfer cerbydau mwy neu griwiau cynhyrchu mwy.

Cyfyngiadau ar ddefnyddio drôn: Oes. Mae eiddo wrth ymyl tir y Weinyddiaeth Amddiffyn, felly byddai angen ceisio caniatâd ganddynt yn gyntaf.

Mae'r Amgueddfa yn adeilad hunangynhwysol, ond mae llety a bwyty'r Caban drws nesaf, ac mae Canolfan Parry Thomas yn gartref i siopau manwerthu a bwyty sydd o fewn tafliad carreg. Mae maes chwarae antur ac ardal pêl-foli o fewn tafliad carreg.

Mae man digwyddiadau pwrpasol, hygyrch yn amgylchynu’r datblygiad, sy’n arddangos golygfeydd godidog o’r traeth saith milltir o hyd a Bae Caerfyrddin.