Strategaeth Trawsnewid Digidol 2021 - 2024

Ein gweledigaeth ar gyfer Sir Gaerfyrddin

“Sir Gaerfyrddin sydd wedi'i galluogi'n ddigidol”

Er mwyn cyflawni'r weledigaeth fentrus hon, mae'n rhaid i ni wneud y canlynol:  

• Darparu gwybodaeth a gwasanaethau trafodiadol ar-lein mewn modd sy'n hawdd ei ddefnyddio ac yn gynhwysol.
• Hwyluso ac ategu cyfranogiad cymunedau a busnesau ym mhopeth a wnawn.
• Newid y ffordd y mae gwasanaethau wyneb yn wyneb traddodiadol yn cael eu darparu, gan alluogi gwasanaethau mwy effeithiol ac effeithlon ar gyfer ein trigolion.
• Datblygu a gwella ein gweithlu digidol gan sicrhau arferion gweithio ystwyth a symudol a defnyddio'r technolegau mwyaf priodol i gefnogi darparu gwasanaethau.
• Gweithio tuag at sicrhau cysylltedd digidol cyflym a dibynadwy i'n holl Ddinasyddion a Chymunedau.
• Cefnogi busnesau i gystadlu yn yr economi ddigidol drwy gysylltedd symudol a band eang o'r radd flaenaf.
• Gwella'r defnydd o dechnoleg ddigidol i gydweithio â phartneriaid yn ddi-dor, gan gynnwys rhannu a defnyddio data'n effeithiol.
• Datblygu gwasanaethau digidol effeithlon drwy arloesi.
• Dadansoddi data a gwybodaeth busnes er mwyn gwneud penderfyniadau strategol yn seiliedig ar dystiolaeth.

Beth yw Strategaeth Trawsnewid Digidol?

Roedd ein Strategaeth Trawsnewid Digidol gyntaf ar gyfer 2017-2020 yn nodi blaenoriaethau a dyheadau digidol strategol y Cyngor ac roedd wedi sicrhau, pan ddechreuodd y pandemig, ein bod ni fel awdurdod mewn sefyllfa gref iawn. Mae'r Strategaeth Trawsnewid Digidol hon ar gyfer 2021-2024 yn adeiladu ar y cynnydd a wnaed dros y pedair blynedd diwethaf wrth i ni amlinellu’r hyn yr ydym yn bwriadu ei wneud er mwyn gwireddu ein gweledigaeth ar gyfer Sir Gaerfyrddin Ddigidol. Dangosodd ein dibyniaeth ar dechnoleg drwy gydol y pandemig i ddarparu gwasanaethau rheng flaen hanfodol pa mor eang yw technoleg ddigidol ar draws pob sector a sut y mae wedi'i hintegreiddio'n llawn mewn sawl agwedd ar ein bywydau. Mae angen Strategaeth Trawsnewid Digidol arloesol a chyffrous ar Gyngor Sir Caerfyrddin oherwydd profwyd y gall technoleg ddigidol drawsnewid y Sir a bywydau pobl yn ogystal â chreu arbedion tymor hir ar gyfer y Cyngor.

Mae'r Cyngor, drwy'r tîm Trawsnewid i Wneud Cynnydd (TIC), yn parhau i hybu prosiectau newid gwasanaethau trawsnewidiol. Mae'r Grŵp Llywio Trawsnewid Digidol wedi'i ad-drefnu i flaenoriaethu a monitro'r gwaith o gyflawni'r prosiectau allweddol a nodwyd yn y strategaeth hon ac mae'r holl ffrydiau gwaith perthnasol a sefydlir bellach yn adrodd i'r grŵp llywio hwn. Er mwyn gwireddu'n llawn y manteision y gall technoleg ddigidol eu cynnig a sicrhau bod gwasanaethau'r Cyngor yn ariannol gynaliadwy yn y dyfodol, byddwn yn parhau i gynyddu cwmpas ac, mewn rhai meysydd, gyflymder ein gwaith o ran technoleg ddigidol.

Mae trawsnewid digidol yn herio ac yn gwella sut y caiff pethau eu gwneud heddiw. Bydd Cyngor Sir Caerfyrddin yn parhau i groesawu newid a bydd hyn yn cael ei gyflawni drwy wneud mwy o ddefnydd o dechnoleg ddigidol a sianeli cyfryngau cymdeithasol, gan adeiladu ar y cynnydd sylweddol a wnaed yn y meysydd hyn dros y pedair blynedd diwethaf.

Rydym yn cydnabod bod gan ysgolion anghenion eithriadol o ran TGCh, ac i roi mwy o sylw i hyn, bydd Strategaeth Ysgolion Digidol ddiwygiedig yn cael ei datblygu sy'n cyd-fynd â Fframwaith Cymhwysedd Digidol Llywodraeth Cymru, Safonau Digidol Addysg a'r Grant HWB newydd. Bydd y strategaeth hon yn adlewyrchu'r ffyrdd newydd o weithio a nodwyd drwy'r pandemig a'r angen i wella'r model dysgu cyfunol mewn addysg.

Adeiladu Sylfeini Digidol yn Sir Gaerfyrddin

Sir Gaerfyrddin yw'r sir drydedd fwyaf yng Nghymru, ac mae'n cwmpasu rhyw 2,365 cilometr sgwâr. Mae Sir Gaerfyrddin yn sir o wrthgyferbyniadau. Mae economi a thirwedd amaethyddol cefn gwlad Sir Gaerfyrddin yn cyferbynnu ag ardal drefol a diwydiannol y rhan dde-ddwyreiniol. Mae'r sir yn datblygu'n economi fodern sy'n cynnwys diwydiannau peirianneg ysgafn, gwasanaeth a thechnoleg newydd ynghyd â mentrau busnes eraill.

Bargen Ddinesig Bae Abertawe

Nod cynnig Bargen Ddinesig Bae Abertawe yw helpu i roi'r rhanbarth ar flaen y gad yn yr oes ddigidol mewn byd ôl-Covid-19, drwy ganolbwyntio ar ddatblygu seilwaith digidol y Genhedlaeth Nesaf, gan gynnwys gwelliannau i ehangu'r ddarpariaeth o alluoedd Wi-Fi, 4G/5G a band eang cyflym iawn sefydlog all ymdopi â gigabit er budd ardaloedd trefol a gwledig y rhanbarth. Bydd gwell seilwaith digidol yn galluogi'r rhanbarth i arloesi, treialu a masnacheiddio atebion clyfar ar y rhyngrwyd yn fyd-eang a fydd yn trawsnewid yr economi mewn meysydd fel ynni, gweithgynhyrchu a gwyddorau bywyd. Bydd hyn yn effeithiol o ran cefnogi gweithio gartref ar raddfa fawr, gwella mynediad i swyddi, codi lefelau cynhyrchiant yn yr economi leol, helpu i fynd i'r afael â phroblemau lleol o ran tagfeydd yn ogystal â chefnogi arloesi/gwelliannau o ran y ddarpariaeth prif ffrwd. Bydd y mewnfuddsoddiad hwn yn helpu i wella cysylltedd digidol yn ardaloedd gwledig y Sir.

• Fel rhan o Fargen Ddinesig Bae Abertawe, bydd Cyngor Sir Caerfyrddin yn arwain ar dair Rhaglen a Phrosiect mawr.
• Rhaglen o fuddsoddiad Seilwaith Digidol ar draws y rhanbarth, cyfanswm cost y prosiect fydd £55M (£25 miliwn Bargen Ddinesig, £30 miliwn cyllid y Sector Cyhoeddus a'r Sector Preifat).
• Yn y Clwstwr Digidol Creadigol yn Yr Egin, bydd prosiect â chyfanswm cost o £24 miliwn (£5 miliwn Bargen Ddinesig + £16 miliwn Sector Cyhoeddus £3 miliwn Sector Preifat) yn cael ei roi ar waith gan greu mwy na 200 o swyddi dros y 15 mlynedd nesaf.
• Cyfanswm cost y prosiect fydd £200 miliwn (£40 miliwn Bargen Ddinesig, £32 miliwn Cyllid Sector Cyhoeddus a £127 miliwn Sector Preifat) a bydd yn creu mwy na 1800 o swyddi dros y 15 mlynedd nesaf yn natblygiad Pentref Awel.

Yr Iaith Gymraeg

Mae'r iaith Gymraeg yn rhan allweddol o'n bywydau pob dydd yn Sir Gaerfyrddin ac mae 50.3% o'r boblogaeth dros 3 oed yn siaradwyr Cymraeg. Mae'n rhaid i'n gwasanaethau ar-lein gael eu darparu'n ddwyieithog a'u hyrwyddo i'n trigolion yn unol â Mesur y Gymraeg, 2011.

Awdurdod Carbon Sero-Net

Ar 20 Chwefror 2019, penderfynodd Cyngor Sir Caerfyrddin yn unfrydol gefnogi Rhybudd o Gynnig i ddatgan argyfwng hinsawdd ac i fod yn awdurdod lleol carbon sero-net erbyn 2030.

Cymeradwywyd Cynllun Sero-net ar 12 Chwefror 2020.

Mae gennym rôl bwysig i'w chwarae o ran lleihau ein hallyriadau nwyon tŷ gwydr ein hunain ymhellach a darparu'r arweiniad i annog trigolion, busnesau a sefydliadau eraill i gymryd camau i leihau eu hôl troed carbon eu hunain.

Mae gan dechnoleg rôl gynyddol i'w chwarae wrth fynd i'r afael â'r heriau hyn. Nod y strategaeth drawsnewidiol hon yw ategu cynllun gweithredu'r Awdurdod a chyda datblygiadau technolegol pellach dros y blynyddoedd nesaf, bydd o gymorth mawr i'r Awdurdod o ran cyflawni'r ymrwymiad hwn. Drwy gydol y pedwar maes Blaenoriaeth Allweddol ceir atebion a dulliau gweithredu arloesol a fydd yn gyrru'r agenda hwn yn ei flaen ac yn ategu'r gwaith sylweddol a wnaed eisoes i wella hyblygrwydd ac ystwythder ein gweithlu a'n hystâd.

Sut y gwneir cynlluniau – Yr hierarchaeth gynllunio

“Y Gacen Briodas a’r Edau Euraidd”

Bydd y Strategaeth Trawsnewid Digidol yn sicrhau bod modd cyflawni nifer o'r canlyniadau disgwyliedig a nodwyd yn Strategaeth Gorfforaethol ddiwygiedig y Cyngor (Ebrill 2021) a fydd yn ei dro yn ategu cyflawni ein Hamcanion Llesiant. Bydd cynlluniau gweithredu yn cael eu datblygu i gyflawni'r prosiectau allweddol a nodwyd a bydd y rhain yn cael eu monitro drwy'r System Rheoli Perfformiad a chyflwynir adroddiadau yn eu cylch bob blwyddyn. Bydd pob prosiect yn cael ei gynllunio a'i gyflawni yn unol â'r 5 Ffordd o Weithio.

Deddf Llesiant Cenedlaethau’r Dyfodol (Cymru) 2015

Strategaeth Trawsnewid Digidol - Meysydd Blaenoriaeth Allweddol

Mae pedwar maes blaenoriaeth allweddol a fydd yn ein galluogi i gyflawni ein gweledigaeth gyffredinol.

Aelodau Etholedig

Mae ein haelodau etholedig yn allweddol o ran croesawu'r dechnoleg ddigidol ddiweddaraf a byddwn yn sicrhau ein bod yn darparu gwasanaeth digidol cynhwysol i'n trigolion. Byddwn yn parhau i alluogi ein haelodau etholedig i weithio mewn modd effeithlon a symudol yn eu cymunedau gan ddefnyddio'r dechnoleg ddigidol fwyaf priodol sydd ar gael.

Yr adnoddau sydd eu hangen

Mae'r Awdurdod yn buddsoddi swm sylweddol o adnoddau i sicrhau ei fod yn cyflawni blaenoriaethau allweddol a chanlyniadau Strategaeth Trawsnewid Digidol 2021-2024:

• £600k i drawsnewid y ffordd yr ydym yn darparu ein gwasanaethau ar-lein.
• Buddsoddi £440k i adnewyddu seilwaith technoleg sy'n heneiddio i gefnogi gweithle digidol.
• £400 i wella a datblygu ein rhwydwaith (llais a data) a gofynion lled band cynyddol.
• £270k i wrthsefyll risgiau seibrdroseddu a gwella diogelwch ar-lein.
• £114k o gyllid ar gyfer hyfforddiant i staff i sicrhau y gall Cyngor Sir Caerfyrddin fanteisio i'r eithaf ar y technolegau diweddaraf.

Key priorities: Cyfranogiad

Galluogi dinasyddion i gael y gwasanaethau a'r wybodaeth sydd eu hangen arnynt ar-lein"

Beth mae'n ei olygu?

• Darparu gwybodaeth a gwasanaethau o ansawdd uchel sy'n hawdd eu defnyddio ar-lein i drigolion.
• Darparu mwy o fynediad digidol 24/7 i wasanaethau sy'n ddwyieithog ac yn hwylus i'r cwsmer.
• Darparu gwasanaeth digidol personol ac ymateb i anghenion cwsmeriaid drwy ymgysylltu â'n cwsmeriaid a'u cynnwys yn y gwaith o gynllunio ein gwasanaethau a gwelliannau i'r gwasanaeth.
• Byddwn yn sicrhau ein bod yn apelio at holl ddemograffeg y sir ac yn cynnwys pawb; gan ganolbwyntio ar hygyrchedd a thechnoleg ddigidol i gefnogi anghenion defnyddwyr.

Pam y mae hyn yn bwysig?

• Bodloni gofynion cwsmeriaid ac ymateb i ddisgwyliadau cynyddol cwsmeriaid.
• Gwella ymgysylltu â chwsmeriaid gyda mynediad i wasanaethau a gwybodaeth wedi'i phersonoli.
• Gyda mwy o ddefnydd o dechnoleg symudol, darparu mynediad i wasanaethau ar-lein pan fydd yn gyfleus i gwsmeriaid; ‘unrhyw bryd, unrhyw le’ 24/7.

Sut y byddwn yn sicrhau Cyfranogiad Digidol?

• Byddwn yn moderneiddio'r gwasanaethau a ddarperir drwy ddefnyddio technoleg newydd ac arloesol i ddarparu gwasanaethau ar-lein.
• Byddwn yn parhau i wella gwefan y Cyngor gan sicrhau bod pob dyfais symudol yn cael mynediad llawn i wasanaethau'r Cyngor.
• Gwella'r ffordd yr ydym yn dylunio ac yn creu systemau TG gan roi anghenion a phrofiad y cwsmer wrth wraidd sut y bydd systemau newydd yn gweithredu ac yn gweithio.
• Byddwn yn datblygu gwell dealltwriaeth o'r sianeli digidol a ffefrir gan gwsmeriaid ar gyfer cyfathrebu â'r Cyngor.
• Byddwn yn sicrhau diogelwch gwybodaeth cadarn er mwyn diogelu ein data am ddinasyddion a busnesau rhag camddefnydd a bygythiadau seibr a diogelu hunaniaethau digidol.
• Byddwn yn sicrhau bod gwasanaethau'r Cyngor yn cael eu hailddylunio a'u bod yn ddigidol yn ddiofyn; gan sicrhau eu bod yn bodloni ac yn rhagori ar ganllawiau a safonau presennol o ran hygyrchedd.

Key projects timeline

Key priorities: Y Gweithlu

Cynnwys a chyfathrebu â staff ym mhopeth a wnawn. Helpu ein gweithlu i fabwysiadu arferion gweithio hyblyg er mwyn perfformio cystal ag y bo modd wrth ddarparu gwasanaethau cost-effeithiol sydd o safon

Beth mae'n ei olygu?

• Gweithlu digidol sy'n ymatebol ac yn hyblyg.
• Gweithlu sy'n wybodus, yn gysylltiedig ac y cyfathrebir ag ef.
• Bod yn ymatebol i anghenion ein dinasyddion drwy ddarparu gwasanaethau cyhoeddus da a bod yn hyblyg o ran lle mae'r gwaith yn cael ei wneud.
• Hyblygrwydd ar gyfer ein staff yw'r gallu i weithio o leoliadau gwahanol, ar amserau gwahanol a defnyddio'r dechnoleg fwyaf effeithiol.

Pam y mae hyn yn bwysig?

• Mae sicrhau bod ein gweithlu yn cymryd rhan ac y cyfathrebir ag ef yn hanfodol i lwyddiant ein sefydliad.
• Mae ystwythder a symudedd yn arwain at arbedion effeithlonrwydd a gwell cynhyrchiant drwy ffyrdd gwell o weithio.
• Mae'n gwella ein gallu i sicrhau cydbwysedd rhwng bywyd a gwaith ar gyfer ein gweithlu sy'n iach ac yn fuddiol i'r naill ochr a'r llall. Mae hyn yn cynyddu ein gallu i ddenu'r sgiliau a'r wybodaeth angenrheidiol ar gyfer ein gweithlu.
• Mae'n caniatáu inni wella prosesau, gweithdrefnau a llif gwaith yn sylweddol, gan ddileu gwastraff a manteisio i'r eithaf ar arbedion effeithlonrwydd drwy wneud defnydd da o ddata a dadansoddi.

Sut y byddwn yn sicrhau Gweithlu Digidol?

• Bydd uwch-reolwyr ar draws yr Awdurdod yn croesawu'r agenda trawsnewid digidol.
• Bydd staff a rheolwyr yn cynnwys ac yn cyfathrebu â'r holl staff ar bob lefel yn aml ac yn gyson.
• Bydd staff a rheolwyr yn cael eu hannog a'u cefnogi i weithio mewn modd ystwyth sy'n helpu i ddarparu gwell gwasanaethau.
• Byddwn yn creu gweithlu gwirioneddol ddigidol, gan sicrhau bod y cymwysiadau a'r wybodaeth iawn gan y defnyddiwr iawn, ar y dyfeisiau iawn, ar yr adeg iawn ac yn y lleoliad iawn.
• Byddwn yn datblygu hyder a sgiliau digidol ein gweithlu fel eu bod yn gallu bod yn gynhyrchiol ac yn rhagweithiol wrth ddefnyddio technoleg i ysgogi ffyrdd gwell o ddarparu gwasanaethau cyhoeddus.
• Byddwn yn sicrhau bod ein polisïau a'n strategaethau allweddol yn cael eu hintegreiddio â'n huchelgais digidol, yn enwedig ym meysydd cynllunio gwasanaethau, caffael, twf economaidd a chomisiynu.
• Byddwn yn datblygu Hyrwyddwyr Digidol ym mhob maes gwasanaeth i hyrwyddo a chefnogi'r gweithlu gydag atebion digidol ac anghenion technegol.

Key projects timeline

Key priorities: Cysylltedd

“Galluogi trigolion a busnesau yn y Sir i ddefnyddio technoleg ddigidol i wella eu bywydau”

Beth mae'n ei olygu?

• Gweithio i helpu i sicrhau cysylltedd digidol cyflym a dibynadwy i'n Dinasyddion a'n Cymunedau.
• Cefnogi busnesau i gystadlu yn yr economi ddigidol drwy gysylltedd symudol a band eang o'r radd flaenaf.
• Cydweithio â'r Llywodraeth, Diwydiant a Phartneriaid i sicrhau Cysylltedd Digidol sy'n addas ar gyfer yr 21ain Ganrif.
• Helpu i ysgogi ymwybyddiaeth a dealltwriaeth o wasanaethau symudol a band eang cyflym ac ysgogi mabwysiadu'r gwasanaethau hyn.
• Sicrhau bod trigolion a busnesau yn manteisio i'r eithaf ar y dechnoleg ddigidol ddiweddaraf i wella eu bywydau.
• Galluogi busnesau i ddefnyddio cyfrifiadura cwmwl i gyflymu amser i werth, hybu mabwysiadu technolegau newydd, a chysylltu'r gwasanaethau a gynigir mewn amser real.
• Darparu Gwasanaethau Sector Cyhoeddus Digidol i'n Dinasyddion a'n busnesau drwy seilwaith cysylltedd o'r radd flaenaf.

Pam y mae hyn yn bwysig?

• Bydd Sir Gaerfyrddin sydd wedi'i chysylltu'n llawn yn annog busnesau newydd i fuddsoddi yn y Sir, gan gefnogi'r economi leol a denu cyflogaeth gynaliadwy.
• Bydd Sir Gaerfyrddin sydd wedi'i chysylltu'n llawn yn annog busnesau presennol i arloesi a manteisio ar gyfleoedd newydd.
• Sicrhau bod ein plant yn byw mewn cymunedau sydd wedi'u cysylltu'n ddigidol a bod y technolegau digidol diweddaraf ar gael iddynt er mwyn rhoi'r dechrau gorau posibl mewn bywyd iddynt.
• Dylai pawb sy'n byw yn Sir Gaerfyrddin allu cael mynediad i wasanaethau 'ar lein' y gellir eu defnyddio i wella eu 'hansawdd bywyd'.

Sut y byddwn yn sicrhau Cysylltedd Digidol?

• Byddwn yn creu amgylchedd agored a hyblyg ar gyfer arloesi digidol sy'n croesi ffiniau ac yn rhoi hwb i dwf economaidd ar gyfer y rhanbarth.
• Fel rhan o Fargen Ddinesig Bae Abertawe byddwn yn elwa o fewnfuddsoddi sylweddol i greu Sir Gaerfyrddin wirioneddol gysylltiedig.
• Byddwn yn buddsoddi yn ein cymunedau a'n pobl ifanc i sicrhau cymdogaethau cynaliadwy drwy wella mynediad i dechnoleg ddigidol mewn ardaloedd lle mae'r angen mwyaf.
• Defnyddio ffyrdd o annog pobl ifanc i gyfathrebu â ni'n ddigidol ac annog cyflogadwyedd yn y sir.
• Byddwn yn datblygu gwell hyder a sgiliau digidol ymysg ein grwpiau agored i niwed a'r rhai dros 65 oed.
• Ein nod fydd cael cyllid i ddatblygu gweithgareddau digidol cynaliadwy yn Sir Gaerfyrddin er mwyn cyrraedd y rhai sy'n gallu elwa fwyaf o'r byd digidol’; ar draws busnesau, cymunedau a thrigolion.

Key projects

Key priorities: Arloesi

Bydd atebion digidol arloesol yn galluogi mwy o gydweithio

Beth mae'n ei olygu?

• Rhannu gwybodaeth yn well gyda phartneriaid a sefydliadau eraill.
• Cynyddu rhannu llwyfannau meddalwedd a chaledwedd ar draws y rhanbarth.
• Defnyddio'r atebion digidol diweddaraf ac arloesol ar draws y cyngor i wella profiad cwsmeriaid ymhellach a symleiddio swyddogaethau cefn swyddfa.

Pam y mae hyn yn bwysig?

• Mae arloesi'n sail i 4 maes blaenoriaeth allweddol y strategaeth hon - 'Cyfranogi', 'Gweithlu', 'Cysylltedd' ac 'Arloesi'.
• Mae'n helpu i faethu cydlyniant mewn timau. Mae hyn yn arbennig o berthnasol i dimau sy'n wasgaredig gan fod timau cydlynol yn llawer mwy cynhyrchiol.
• Mae'n creu awyrgylch o fod yn agored gan fod staff yn cael mynediad i'r newyddion a'r wybodaeth ddiweddaraf.
• Mae'n symleiddio'r ffordd yr ydym yn rhannu data gyda phartneriaid a sefydliadau eraill gan sicrhau bod pawb yn teimlo eu bod yn rhan o un tîm sy'n gweithio ar amcanion cyffredin.
• Mae arloesi yn gatalydd ar gyfer galluogi adrannau i ganolbwyntio ar sicrhau bod y dinesydd wrth wraidd yr hyn y maent yn ei wneud.

Sut y byddwn yn sicrhau Arloesi Digidol?

• Byddwn yn sicrhau bod gan staff y dulliau cydweithio angenrheidiol i wella cynhyrchiant a llesiant.
• Byddwn yn diogelu preifatrwydd drwy reoli gwybodaeth yn effeithiol yn ogystal â sicrhau bod trefniadau rhannu data priodol ar waith gyda'r holl sefydliadau a phartneriaid.
• Byddwn yn manteisio'n llawn ar ffyrdd newydd o weithio a thechnolegau newydd, gan gynnwys atebion ffynhonnell agored.
• Byddwn yn hyblyg o ran ein lleoliadau ac yn creu amgylchedd sy'n meithrin cydweithio a chreadigrwydd.
• Byddwn yn datblygu atebion newydd gyda phartneriaid gan ddefnyddio technoleg ddigidol i integreiddio gwasanaethau ar draws ffiniau swyddogaethol a daearyddol fel eu bod yn rhannu gwybodaeth yn fwy effeithlon.
• Byddwn yn cydweithio'n rhanbarthol ac yn genedlaethol i gaffael meddalwedd a gwasanaethau ar gwmwl er mwyn sicrhau gwell gwerth am arian a mwy o amrywiaeth o atebion.

Key projects