Sut i ysgrifennu datganiad ategol

Paratoi

Mae gwaith paratoi yn allweddol a bydd sicrhau bod gennych bopeth sydd ei angen arnoch cyn i chi ddechrau ysgrifennu eich datganiad yn gwneud gwahaniaeth mawr.

Gwnewch ddrafft cyntaf o'ch Datganiad Ategol mewn dogfen Word. Bydd hyn yn ei gwneud yn haws i chi wneud newidiadau a'i anfon at bobl eraill i'w ddarllen i gael ail bâr o lygaid arno. Os ydych wedi cael cymorth i gwblhau eich datganiad, gwnewch yn siŵr eich bod yn deall yr hyn rydych wedi'i ysgrifennu. Bydd gofyn i chi ymhelaethu ar eich Datganiad Ategol os cewch gyfweliad.

Os ydych wedi cael cymorth i gwblhau eich datganiad, gwnewch yn siŵr eich bod yn deall yr hyn rydych wedi'i ysgrifennu. Bydd gofyn i chi ymhelaethu ar eich Datganiad Ategol os cewch gyfweliad. Mae'n bwysig sicrhau bod eich sillafu a'ch gramadeg yn gywir, ceisiwch gael rhywun arall i ddarllen drosto cyn ei gyflwyno. Unwaith y byddwch chi'n hapus â'r hyn rydych chi wedi'i ysgrifennu, yna gallwch ei gopïo a'i gludo i'r ffurflen gais. Pethau i'w cofio:

• Ysgrifennwch mewn paragraffau byrion er mwyn osgoi wal o destun. Dewiswch ffont clir, fel Arial, i wneud yn siŵr bod eich datganiad yn hawdd i'w ddarllen.
• Gosodwch eich atebion yn ôl trefn y meini prawf. Bydd hyn yn ei gwneud yn haws i reolwyr ddod o hyd i'ch atebion.
• Cofiwch gadw eich gwaith wrth i chi fynd yn eich blaen, mae'r ffurflen gais ar-lein yn cau ar ôl 30 munud.
• Mae yna terfyn nodau/geiriau. Os nad oes gennych ddigon o le, gallwch grwpio eich atebion gyda'i gilydd. Os yw'r prosiect y buoch yn gweithio arno yn dangos sgiliau gwahanol, grwpiwch nhw mewn un enghraifft ac ysgrifennwch am y prosiect unwaith, gan dynnu sylw at bob un o'r rhinweddau dan sylw.

Adnabod eich sgiliau

Gall eich sgiliau eich helpu i ddewis yr yrfa iawn i chi ac mae gennych lawer ohonyn nhw'n barod. Efallai y byddwch yn eu datblygu trwy waith, astudio neu weithgareddau rydych yn eu gwneud yn eich amser sbâr. Gellir datblygu sgiliau yn yr ysgol, y coleg neu'r brifysgol. Gallwch eu datblygu drwy weithgareddau allgyrsiol, fel clybiau neu dimau rydych yn rhan ohonynt.

Os ydych chi'n gallu adnabod eich sgiliau a siarad amdanynt, bydd yn haws i chi benderfynu beth rydych chi eisiau ei wneud. Wrth i chi wneud cais am swyddi, dyma'r pethau sy'n argyhoeddi cyflogwyr mai chi yw'r person cywir ar gyfer y swydd.

Ymchwil

Mae ymchwilio i gwmni yn ffordd wych o wneud yn siŵr eich bod chi'n addas ar ei gyfer, yn ogystal â sicrhau y byddai'r sefydliad yn addas i chi.

Beth am gymryd peth amser i edrych o gwmpas ein gwefan? Mae'n dda dangos eich bod wedi ymchwilio i'r sefydliad. Os ydych yn darllen am rywbeth sydd o ddiddordeb i chi, gallwch ychwanegu hyn at eich datganiad, er enghraifft, "Roedd eich prosiect adfywio wedi gwneud argraff fawr arna i..."

Byddem hefyd yn eich annog i edrych ar ein gwerthoedd craidd, maent yn bwysig iawn i ni. Un o'n gwerthoedd yw gweithio fel un tîm. Mae hyn yn bwysig oherwydd drwy gydweithio a chreu cysylltiadau cryf ar draws y sefydliad cyfan, gallwn wneud y defnydd gorau o'n hadnoddau drwy ganolbwyntio ar ein cwsmeriaid a'n cymunedau.

Defnyddio'r model STAR

Pan fyddwch yn ysgrifennu eich Datganiad Ategol, mae angen i chi sicrhau bod rhywfaint o strwythur i'ch atebion. Mae'r model STAR yn ffordd wych o strwythuro eich enghreifftiau.

• Sefyllfa
• Tasg
• Gweithredu (Action)
• Canlyniad (Result)

Mae'n bwysig dilyn cynllun y meini prawf hanfodol, gan sicrhau nad ydych yn anghofio unrhyw beth. Maent hefyd yn ein helpu ni fel cyflogwyr i werthuso'r sgiliau, y rhinweddau a'r profiadau sydd gennych a fyddai'n eich helpu i fod yn addas ar gyfer y swydd neu'r cwmni.

Yma, byddwn yn dangos i chi sut y gallech chi ddefnyddio'r model STAR i ateb y cwestiwn enghreifftiol canlynol:

Q: Allwch chi roi enghraifft i mi o weithio fel rhan o dîm?

Sefyllfa: Disgrifiwch y sefyllfa lle y cynhaliwyd y digwyddiad.

"Pan oeddwn yn yr ysgol, fe wnes i gyflawni fy Ngwobr Dug Caeredin Efydd. Fel rhan o'r wobr, roedd yn rhaid i mi weithio mewn tîm i fynd o un safle gwersylla i'r llall o fewn amser penodol".

Tasg: Disgrifiwch y dasg y gofynnwyd i chi ei chwblhau. Os oedd problem neu fater penodol yr oeddech yn ceisio'i ddatrys, disgrifiwch hynny yma.

"Roeddwn i mewn grŵp o 4 gyda fy ffrindiau. Roedd yn rhaid i bob un ohonom gario gwahanol rannau o'r offer yr oedd ei angen arnom e.e. y babell, polion y babell ac offer coginio. Rwy'n teimlo bod gen i sgiliau cyfathrebu da, felly fe wnes i sicrhau bod pob un ohonom yn gwybod beth oedd y llall yn ei gario pan oedden ni'n gadael y safle i wneud yn siŵr nad oeddem yn gadael unrhyw beth ar ôl. Cefais fy enwebu i fod y cyntaf yn y grŵp i ddarllen y map a defnyddio'r cwmpawd i fynd â ni i'r siecbwynt cyntaf, ac roeddwn i'n hapus i wneud hynny".

Gweithredu: Esboniwch pa gamau a gymeroch chi i gwblhau'r dasg neu ddatrys y broblem: Beth wnaethoch chi, pam y gwnaethoch chi hynny, sut y gwnaethoch chi hynny a pha sgiliau y gwnaethoch chi eu defnyddio.

"Fel grŵp buom yn gweithio'n dda gyda'n gilydd. Roedd un o'r bechgyn yn cael trafferth gyda phwysau ei warbac felly fe wnes i awgrymu ein bod i gyd yn rhoi o'i gynnwys yn ein bagiau i'w wneud yn haws iddo barhau".

Canlyniad: Esboniwch ganlyniad eich gweithredoedd. Er enghraifft, os oedd eich gweithredoedd wedi arwain at gwblhau tasg, datrys gwrthdaro, gwella record gwerthiant eich cwmni, ac ati. Esboniwch hyn. Ceisiwch ganolbwyntio ar sut arweiniodd eich gweithredoedd at lwyddiant.

"Fe wnaethom gyrraedd ein safle gwersylla nesaf o fewn yr amser a ganiatawyd. Roeddwn i'n teimlo ein bod yn gweithio'n dda fel grŵp ac yn trafod unrhyw beth nad oeddem yn siŵr ohono ar hyd y ffordd. Roedd fy ffrind yn teimlo'n hapus ei fod wedi cwblhau'r daith gerdded gan nad oedd yn meddwl y byddai'n llwyddo i wneud hynny ond fel grŵp roeddem wedi'i annog i ddal ati, a thrwy fynd ychydig yn arafach a chymryd rhywfaint o'i offer oddi arno, roeddem yn gallu cyrraedd y gwersyll yn brydlon".

Rhoi ar waith

Gadewch i ni ddechrau cofnodi! Ar ôl i chi wneud y gwaith ymchwil a pharatoi, mae'n amser rhoi hynny ar waith a'i gofnodi. Meddyliwch amdano fel set o olwynion cocos, os ydych yn methu un ohonynt, ni fyddant yn gweithio gyda'i gilydd!

Defnyddio enghreifftiau o fywyd go iawn:

Mae'r rhain yn helpu i ddangos i reolwr beth allwch chi ei wneud ac yn esbonio pam rydych chi'n ddelfrydol ar gyfer y rôl. Yn lle dweud 'mae gen i sgiliau arweinyddiaeth cryf', siaradwch am brosiect y buoch yn gweithio arno neu broses rydych wedi'i chyflwyno.

Gonestrwydd:

Dylech bob amser fod yn onest yn eich ffurflen gais am gyflogaeth flaenorol, profiad a'ch rôl. Efallai y gofynnir cwestiynau i chi am eich datganiad yn ystod cyfweliad.

Byddwch yn glir ac yn gryno gyda'ch atebion:

Peidiwch â gwneud i reolwyr chwilio am gliwiau a llunio eich stori: defnyddiwch y datganiad ategol i'ch mantais ei hun i ddangos eich sgiliau a'ch rhinweddau.

Os nad ydych yn bodloni'r meini prawf hanfodol:

Gall fod yn demtasiwn i beidio ag ysgrifennu am y rhain a gobeithio na fydd neb yn sylwi. Byddwch yn gadarnhaol drwy eu cydnabod a defnyddiwch enghraifft sy'n rhoi hyder i'r cyflogwr y gallwch ddysgu sgiliau newydd yn gyflym.

Pob lwc, a gobeithiwn eich gweld yn fuan!

Nôl i 'Sut i ymgeisio'