Y Polisi Cludiant o'r Cartref i'r Ysgol

Atodiad 1: Sut rydym yn darparu cludiant

1. Dulliau o Ddarparu Cludiant
Bydd y rhan fwyaf o ddysgwyr sydd â hawl i gludiant am ddim o'r cartref i'r ysgol yn teithio ar gerbydau sydd dan gontract uniongyrchol gyda'r Awdurdod Lleol. Pan nad oes cludiant dan gontract addas ar gael, gall yr Awdurdod Lleol ddefnyddio gwasanaethau trafnidiaeth gyhoeddus.

Mewn amgylchiadau lle nad oes opsiwn dan gontract neu drafnidiaeth gyhoeddus priodol yn bodoli ar gyfer taith dysgwr yn ei chyfanrwydd neu ran o'r daith, gall yr Awdurdod Lleol gynnig Cyllideb Teithio Personol i alluogi rhiant, gwarcheidwad neu oedolyn cyfrifol i gludo'r dysgwr i'r ysgol, neu i bwynt casglu priodol os yw'r pellter yn fwy nag 1.5 milltir. Dim ond os yw’r dysgwr yn gymwys i gael cludiant am ddim, ac na all yr Awdurdod ddarparu cludiant o'r fath yn uniongyrchol, y mae'r cymorth hwn ar gael.

2. Mannau Casglu a Gollwng
Nid yw bob amser yn bosibl i lwybrau cludiant basio'n agos i gartref pob dysgwr. Mae rhieni a gwarcheidwaid yn gyfrifol am sicrhau bod dysgwyr yn teithio'n ddiogel i'r man casglu a gollwng dynodedig, sydd fel arfer heb fod yn fwy nag 1.5 milltir o'r cyfeiriad cartref.
Dim ond ar ddechrau a diwedd y diwrnod ysgol y darperir cludiant, yn unol ag oriau gweithredu safonol yr ysgol. Nid oes rheidrwydd ar yr Awdurdod Lleol i ddarparu cludiant:

• I ddrws y cartref,
• Ar yr union amseroedd y gwnaed cais amdanynt gan rieni a gwarcheidwaid, neu
• Yn ystod y diwrnod ysgol, rhwng safleoedd, neu ar gyfer presenoldeb rhannol.

Nid yw clybiau brecwast, gweithgareddau ar ôl ysgol, a digwyddiadau allgyrsiol yn cael eu cwmpasu gan gludiant am ddim o'r cartref i'r ysgol.

3. Amser Teithio
Lle bo'n bosibl, cedwir amser teithio yn rhesymol. Fodd bynnag, gall hyd y daith amrywio yn dibynnu ar:

• Daearyddiaeth wledig,
• Nifer y teithwyr a
• Llwybr y contract.

Bydd yr Awdurdod Lleol yn cynllunio llwybrau i sicrhau cludiant diogel ac effeithlon, ond ni all warantu amseroedd teithio byrrach neu rai wedi'u teilwra'n unigol.

4. Ymddygiad ar gludiant ysgol
Rhaid i bob dysgwr sy'n defnyddio cludiant a ddarperir gan yr Awdurdod Lleol ddilyn y Cod Ymddygiad Cludiant o'r Cartref i'r Ysgol/Coleg.

Gall camymddwyn arwain at rybuddion, atal dros dro rhag cludo, neu dynnu'n ôl o drefniant cludiant penodol. Pan fo'n ofynnol i drafnidiaeth fodloni dyletswydd statudol yr Awdurdod Lleol, gellir ystyried trefniadau arall lle bo angen i sicrhau mynediad rhesymol i addysg.

Cyfrifoldeb rhieni neu warcheidwaid yw sicrhau bod dysgwyr yn deall ac yn cydymffurfio â'r disgwyliadau o ran ymddygiad.

5. Defnyddio Camerâu
Gellir gosod teledu cylch cyfyng neu ddyfeisiau recordio eraill ar rai cerbydau dan gontract at ddibenion:

• Diogelu,
• Monitro ymddygiad, a
• Sicrhau bod gyrwyr a theithwyr yn ddiogel.

Bydd yr hyn sy'n cael ei recordio yn cael ei reoli yn unol â deddfwriaeth diogelu data ac yn cael ei ddefnyddio at ddibenion gweithredol neu ddiogelu dilys yn unig.

6. Trefniadau Cludiant Ôl-16
Nid yw'r ddarpariaeth cludiant ar gyfer dysgwyr ôl-16 yn cael ei gwneud ar yr un sail ag ar gyfer dysgwyr o oedran ysgol statudol.

Darperir cludiant ôl-16 ar y sail bod disgwyl i ddysgwyr deithio'n annibynnol i gael mynediad i'r rhwydwaith cludiant craidd. Mae'r trefniadau fel a ganlyn:

• Cyfrifoldeb y dysgwyr yw cyrraedd pwynt addas ar y rhwydwaith cludiant craidd.
• Mewn rhai amgylchiadau, efallai y bydd angen i ddysgwyr deithio mwy nag 1.5 milltir i gael mynediad at gerbyd addas ar y rhwydwaith craidd.
• Ni ddarperir unrhyw drefniadau cludiant pwrpasol neu fwydo ar gyfer dysgwyr ôl-16, oni bai bod anghenion symudedd wedi'u nodi (ADY).
• Ni fydd cludiant yn cael ei ddarparu i ddysgwyr sy'n byw o fewn tair milltir i'w man dysgu, boed llwybr cerdded ar gael neu beidio.

Mewn amgylchiadau eithriadol, efallai y caniateir i ddysgwyr sy'n symud ymlaen i addysg ôl-16 yn eu hysgol ddalgylch ddynodedig barhau i ddefnyddio cerbydau bwydo presennol, os oes digon o seddi gwag ar gael. Mae trefniadau o'r fath yn ddewisol ac yn amodol ar adolygiad blynyddol, ac nid ydynt yn gyfystyr â hawl i ddarpariaeth barhaus.