Mae Hendy-gwyn ar Daf yn gartref i amrywiaeth eang o fusnesau a chyfleoedd cyflogaeth, gan gynnwys canol tref hynod ac ocsiwn a marchnad da byw brysur. Mae Hendy-gwyn ar Daf mewn man strategol rhwng Caerfyrddin a Hwlffordd ar yr A40 a rheilffordd Llundain-Abergwaun, sy'n golygu ei bod yn cynnig cysylltedd da.
Y tu allan i'r dref, mae yna ystod eang o fentrau gwledig gan gynnwys amaethyddiaeth, diwydiannau'r tir, bwyd a diod a thwristiaeth. Mae yna lawer o ficrofusnesau, gan gynnwys diwydiannau 'ffordd o fyw', diwydiannau'n ymwneud ag ymwelwyr a diwydiannau creadigol sy'n cyfuno byw a gweithio mewn ardaloedd gwledig. Mae ochr sylfaenol bwysig i’r economi hefyd gyda llawer o bobl yn cael eu cyflogi i ddarparu gwasanaethau lleol hanfodol o ddydd i ddydd, crefftau medrus, a phroffesiynau fel hyfforddwyr gyrru, gofal plant a gofal cartref ac ati.
Mae Hendy-gwyn ar Daf hefyd yn ganolbwynt ar gyfer addysg uwchradd a chysylltiadau rheilffordd ar gyfer Sanclêr a Thalacharn gerllaw. Mae'n chwarae rhan hanfodol o ran darparu gwasanaethau cymdeithasol, cyflogaeth, addysgol a manwerthu i'r pentrefi cyfagos yn Ward Llanboidy yn Sir Gaerfyrddin a Ward Llanbedr Felffre yn Sir Benfro.
Mae Hendy-gwyn ar Daf yn dref sy'n tyfu gyda thwf bach mewn poblogaeth a thai yn y blynyddoedd diwethaf. Mae twf economaidd y dref hefyd yn amlwg yn y nifer uwch na'r cyfartaledd o bobl o oedran gweithio sy'n byw yn yr ardal sy'n economaidd weithgar ac mewn cyflogaeth amser llawn.
