Risgiau Iechyd Fepio

Nid yw fepio i ti. Mae wedi'i anelu at oedolion sy'n ceisio rhoi'r gorau i ysmygu, nid plant neu bobl nad ydyn nhw'n ysmygu. Mae rhai o'r risgiau iechyd yn cynnwys:

Caethiwed: Mae nicotin yn gaethiwus iawn. Nid oes angen i ti fepio bob dydd i fynd yn gaeth.
Datblygiad yr ymennydd: Gall nicotin ymyrryd â datblygiad dy ymennydd, gan effeithio ar dy allu i ganolbwyntio a gwneud dysgu'n galetach. Mae'n bosibl y bydd rhai newidiadau yn para am byth.
Iechyd Meddwl: Gall fepio waethygu gorbryder ac iselder. Gall hefyd effeithio ar dy gof ac ar dy allu i ganolbwyntio ac i reoli dy chwantau.
Ysmygu: Os wyt ti'n fepio, rwyt ti'n fwy tebygol o ddechrau ysmygu sigaréts arferol - a gall hynny arwain at hyd yn oed fwy o broblemau iechyd.
Camweithrediad Rhywiol: Mae tystiolaeth y gall fepio achosi problemau iechyd rhywiol i ddynion.
Tocsinau: Mae fêps yn rhyddhau cemegau niweidiol i'r aer rwyt ti'n ei anadlu i mewn ac allan. Nid anwedd dŵr yn unig yw e.
Niwed i'r Ysgyfaint: Gall fepio achosi cyflyrau cronig ar yr ysgyfaint, fel broncitis, a gall arwain at ddifrod sy'n bygwth bywyd dros amser.
Risgiau Canser: Gall y cemegau mewn aerosol fêps gynyddu'r risg o ganser.
Arian: Mae fepio yn costio arian. Pam ei wario ar rywbeth sy'n dy niweidio pan allet ti ei ddefnyddio ar gyfer pethau sy’n dda i ti?

Dydyn ni ddim yn gwybod popeth o hyd am effeithiau hirdymor fepio, ond mae'r risgiau'n rhai go iawn.

Mae rhai o'r brandiau fêps mwyaf yn eiddo i gwmnïau sydd hefyd yn gwerthu sigaréts arferol. Maen nhw eisiau dy ddal di’n ifanc drwy gynnig blasau diddorol a hysbysebion hwyl i bobl ifanc fel ti. Paid â chwympo amdano - maen nhw ond yn ceisio dy gael di i fod yn gwsmer gydol oes.


Y Ffeithiau y Mae Angen i Ti Eu Gwybod

  • Mae fêps tafladwy yn dod mewn 3 chryfder nicotin - 0mg (heb nicotin),10mg,a 20mg.
  • Mae fêp 600 o byffiau (fel Elf Bar melon dŵr) gyda 20mg o nicotin yn cyfateb i ysmygu 48 o sigaréts.
  • Mae fêps gyda thros 20mg o nicotin neu fwy na 600 o byffiau yn anghyfreithlon a gallent gynnwys cynhwysion niweidiol.

Gall fepio edrych yn cŵl neu'n hwyl, ond y gwir yw ei fod yn beryglus, yn gaethiwus ac yn niweidiol i dy iechyd. 

Os wyt ti am fod y fersiwn gorau, mwyaf iach o ti dy hun, paid â fepio o gwbl. 

Bydd Gall, Bydd Iach