Fy Nghyfrifon

Sanclêr

Mae Sanclêr yn dref sydd ar ei thyfiant gyda thwf mewn poblogaeth a thai yn y blynyddoedd diwethaf. Mae'r dref yn agos iawn at Gaerfyrddin, ac mae hyn wedi helpu i yrru'r datblygiad preswyl. Mae'r twf hwn wedi helpu i gynnal nifer y bobl o oedran gweithio, sy'n weithgar yn economaidd ac mewn cyflogaeth amser llawn.

Mae mynediad uniongyrchol y dref i'r A40 wedi annog twf cyflogaeth draddodiadol gref gan gynnwys sawl ardal gyflogaeth ddiwydiannol a masnachol ledled y dref.

Mae yna hefyd ganol tref fechan draddodiadol. Y tu allan i'r dref, mae'r economi yn cefnogi ystod eang o fentrau gwledig gan gynnwys amaethyddiaeth, diwydiannau'r tir, bwyd a diod a thwristiaeth. Mae yna hefyd lawer o ficrofusnesau, gan gynnwys diwydiannau 'ffordd o fyw', diwydiannau'n ymwneud ag ymwelwyr a diwydiannau creadigol mwy newydd sy'n cyfuno byw a gweithio mewn ardaloedd gwledig.

Mae ochr sylfaenol bwysig i’r economi hefyd gyda llawer o bobl yn cael eu cyflogi i ddarparu gwasanaethau lleol hanfodol o ddydd i ddydd, crefftau medrus, a phroffesiynau fel hyfforddwyr gyrru, trwsio cyfrifiaduron a hyfforddwyr personol ac ati.

Mae rôl ehangach Sanclêr yn cynnwys cefnogi'r rôl gymdeithasol, cyflogaeth, addysg a manwerthu lleol ar gyfer Talacharn a phentrefi llai anghysbell fel Bancyfelin a chymunedau yn Wardiau Llansteffan a Thre-lech. Mae canolfan hamdden Sanclêr hefyd yn diwallu anghenion trefi cyfagos.

Darganfod Sanclêr

Prosiect Deg Tref

Fel adeilad angori ar gyfer y dref, Y Gât oedd canolbwynt y prosiect Deg Tref yn Sanclêr. Mae'r adeilad, a oedd yn cael ei adnabod gynt fel Canolfan Grefftau Gorllewin Cymru, bellach yn cael ei reoli gan Gyngor Tref Sanclêr yn hytrach na'r Awdurdod fel rhan o drosglwyddo asedau.

Eisoes yn gartref i wasanaethau allweddol a microfusnesau, y flaenoriaeth oedd ad-drefnu rhannau o'r llawr gwaelod i greu gofod addas i'r diben lle'r oedd yr oriel o'r blaen, ynghyd â chreu mynedfa ar wahân i ardal y caffi.

I gyd-fynd â'r gwaith cyfalaf, bydd offer i hwyluso darpariaeth o'r Gât hefyd yn cael eu cyrchu. Mae sgriniau digidol wedi'u gosod y tu allan i'r Gat, a fydd yn cynnwys cyfeiriadur busnes lleol a gwybodaeth am ddarpariaeth, gwasanaethau a digwyddiadau.

I gefnogi gweithgaredd a gynhelir yn Y Gat, bydd cydlynydd y Ganolfan yn cael ei benodi i ymgysylltu â’r gymuned leol.

 

 

 

 

 

Adfywio Canol Trefi Gwledig

Dywedodd perchnogion busnesau lleol fod angen cymorth i fywiogi y tu allan i'w heiddo.

Crëwyd cronfa grant bwrpasol i gefnogi'r gwaith hwn ac mae llawer o adeiladau stryd fawr yn Sanclêr wedi'u cymeradwyo i wella tu allan eu hadeilad er mwyn sicrhau bod y dref yn fywiog ac yn edrych yn dda.

 

Yn ogystal, mae Steve Jenkins, yr artist stryd o Sir Gaerfyrddin, wedi creu murluniau yn y dref sy'n seiliedig ar ei hanes a'i threftadaeth. Mae’r ddau furlun, yn Fferyllfa Evans a Thŷ tafarn Santa Clara, wedi cael ymateb da gan drigolion, busnesau ac ymwelwyr â’r ardal.

Cymunedau Cynaliadwy

Yn ddiweddar, mae Capel newydd Bethlehem wedi trawsnewid y llawr gwaelod i fod yn hwb i’r gymuned. Bydd y prosiect hwn yn helpu i brynu a gosod cegin ac offer newydd, a celfi ar gyfer yr hwb.

Mae arian hefyd ar gael ar gyfer penodi rheolwr amser llawn i hyrwyddo a threfnu'r defnydd o'r adeilad.

Mae Capel Newydd Bethlehem yn ganolfan i gymuned Pwll-trap a’i hanghenion; yn benodol, canolfan i hyrwyddo gweithgareddau drwy gyfrwng y Gymraeg a'r defnydd o'r iaith yn y gymuned yn ogystal â gweithgareddau cymdeithasol, hamdden a llesiant.

Deg Tref yn mynd i'r Afael â Threfi

Mae'r cynllun Mynd i'r Afael â Threfi wedi'i gyflwyno'n uniongyrchol gan Gyngor Sir Caerfyrddin.

Maes parcio Heol Pentre yw’r prif faes parcio sy’n gwasanaethu’r dref, ac mae hefyd yn cynnwys mynediad i rodfa ar lan yr afon a pharc sglefrio sy'n cael ei ddefnyddio'n aml. Mae'r ardal ailgylchu yn y maes parcio wedi cael ei sgrinio ac mae celfi stryd sy'n addas i bobl anabl wedi'u gosod ger mynedfa’r llwybr cerdded ar lan yr afon. Mae gan y dref eisoes balet lliw treftadaeth sy'n cael ei ddefnyddio ar gyfer ei chelfi stryd a’i pholion lamp, sy'n cael eu hadnewyddu fel rhan o'r cynllun. 

Neuadd Gymunedol Cei Taf

Mae Cei Taf, Neuadd Gymunedol ac iard gychod yn Sanclêr isaf, gerllaw lle mae afon Cynin ac Afon Taf yn cwrdd.

Yn awyddus i ailddatblygu'r ased cymunedol hwn, mae cymorth wedi'i gymeradwyo ar gyfer cam cyn datblygu'r prosiect hwn. 

 

Canolfan Hamdden Sanclêr

Llwyddodd tîm Actif Cyngor Sir Caerfyrddin i gael cymorth gan y Gronfa Arloesi Gwledig i ymateb i ddymuniad cymuned Sanclêr i ddatblygu model gweithredu cynaliadwy newydd ar gyfer y ganolfan hamdden sydd yn y dref. Ochr yn ochr ag ymgysylltu â’r gymuned i lunio modelau posibl ar gyfer y dyfodol, cefnogodd y prosiect nifer o fentrau newydd megis marchnadoedd ffermwyr misol, digwyddiadau llesiant ac i deuluoedd er mwyn annog ymwelwyr newydd i ddod i'r Ganolfan.

Hwb