Pam yr ydym yn ymgynghori
Mae Cyngor Sir Caerfyrddin yn bwrw ymlaen â chynlluniau i gyflwyno systemau draenio cynaliadwy (SuDS) ym meysydd parcio dwy dref wledig fel rhan o'i ymrwymiad parhaus i wella ansawdd dŵr a diogelu amgylchedd naturiol y sir.
Bydd y Prosiect Afonydd Gwydn yn archwilio opsiynau draenio cynaliadwy ar gyfer Maes Parcio Llanymddyfri a Maes Parcio Castellnewydd Emlyn. Nod y cynlluniau arfaethedig yw lleihau faint o ddŵr wyneb ffo sy'n mynd i mewn i rwydweithiau draenio lleol ac afonydd cyfagos.Trwy gyflwyno nodweddion systemau draenio cynaliadwy, bydd glawiad yn cael ei arafu a'i hidlo lle mae'n glanio, yn hytrach na llifo oddi ar y tarmac ac i mewn i'r draen.
Bydd y dull arloesol hwn yn helpu i leihau'r risg o orlif stormydd, gwella ansawdd dŵr lleol, a chefnogi'r gwaith o ddiogelu Ardaloedd Cadwraeth Arbennig y Teifi a'r Tywi rhag cyfoethogi maetholion.
Mae cyllid ar gyfer cam datblygu'r prosiectau wedi'i sicrhau gan Gyfoeth Naturiol Cymru.
Sut i gymryd rhan
Er mwyn sicrhau bod y cymunedau lleol yn cael cyfle i ddysgu mwy a rhannu eu barn, cynhelir sesiynau galw heibio yn y ddwy dref:
Llanymddyfri - Y Gannwyll, Dydd Mawrth , 25 Tachwedd 10:00am – 2:00pm
Castellnewydd Emlyn – Neuadd Cawdor, Dydd Iau 27 Tachwedd, 10:00am–2:00pm
Bydd swyddogion y cyngor wrth law yn y ddwy sesiwn i drafod y cynigion a chasglu adborth gan drigolion.
I'r rhai nad ydynt yn gallu mynychu'n bersonol, bydd cyfle hefyd i roi eu barn drwy ffurflen adborth digidol drwy ddilyn y dolenni isod.
Camau nesaf
- Bydd adborth o'r sesiynau galw heibio a'r ymgynghoriad ar-lein yn cael ei ddefnyddio i fireinio dyluniadau.
- Bydd ymchwiliadau safle pellach (topograffig, cyfleustodau a gwaith archwilio'r ddaear) yn cadarnhau manylion fel lefelau dŵr daear ac addasrwydd ar gyfer ymdreiddio.
- Os yw'n bosibl, bydd cyllid dylunio ac adeiladu manwl yn cael ei geisio a bydd amserlenni'n cael eu rhannu â'r gymuned.
Mae nodiadau o'r cam cysyniadol yn nodi rhai ystyriaethau sy'n benodol i'r safle (e.e., agosrwydd at Gastell Llanymddyfri, sy'n rhestredig, cyfleustodau o dan y ddaear a nodweddion hanesyddol posibl) a fydd yn cael sylw drwy gamau dylunio ac ymgynghori arbenigol yn y dyfodol.
