Dod yn ofalwr Cysylltu Bywydau

Rydym yn wasanaeth cymorth i bobl dros 18 oed sydd eisiau cymorth i fyw’n annibynnol yn eu cymuned, gyda chefnogaeth gofalwr Cysylltu Bywydau. Rydym yn wahanol i ofal dydd, byw â chymorth a gofal preswyl ac rydym yn gwasanaethu cymunedau ar draws Sir Gaerfyrddin, Ceredigion a Sir Benfro.

Rydym yn cynnwys gweithwyr proffesiynol profiadol sydd â chefndir ym maes Addysg, Iechyd a Gofal Cymdeithasol. Rydym wedi ein rhwymo i Gôd Ymarfer Proffesiynol mewn Gofal Cymdeithasol (Cymru), ac mae ein cynllun wedi'i gofrestru gydag Arolygiaeth Gofal Cymru.

Mae ein cynllun wedi bod ar waith ers 2004, ac mae’n darparu llwyth o drefniadau tymor hir a thymor byr bob blwyddyn. Fe'n cynhelir gan grŵp ymroddedig o ofalwyr Cysylltu Bywydau sy’n arbenigo mewn gweithio gyda phobl ag anableddau dysgu, niwroamrywiaeth, cyflyrau iechyd meddwl, yn ogystal â'r rheiny sy'n camu i lawr o wasanaethau ysbyty, pobl â dementia a phobl hŷn.

Beth ydyn ni'n ei wneud

Rydym yn darparu cartrefi parhaol, llety tymor byr a gwasanaethau gwyliau byr (seibiant) i unigolion. Rydym yn gwneud hyn drwy recriwtio a hyfforddi pobl sydd ag "amser i ofalu ac ystafell sbâr". Mae ein gofalwyr yn byw ar draws Sir Gaerfyrddin, Ceredigion a Sir Benfro a gallwn baru unigolion a gofalwyr Cysylltu Bywydau yn ôl lleoliad, math o eiddo a diddordebau a rennir.

Mae bod yn ofalwr Cysylltu Bywydau yn rhoi boddhad mawr. Mae'n golygu agor eich cartref a'ch bywyd i unigolyn ag anghenion gofal, gan roi cymorth, cwmnïaeth ac amgylchedd tebyg i deulu. Gallwn gynnig hyfforddiant rhagorol a chefnogaeth barhaus i chi, gyda’r cyfle i ennill o £495 yr wythnos.

Fel gofalwr Cysylltu Bywydau, mae gennych gyfle i gefnogi rhywun o’ch cartref eich hun, gan gynnwys cymorth yn ystod oriau’r dydd, aros dros nos (seibiannau byr), trefniadau gofal tymor byr a thymor hir. Bydd y tîm yn Cysylltu Bywydau Gorllewin Cymru yn paru gofalwr ac unigolyn sydd angen cymorth, yn unol â phethau megis diddordebau cyffredin, dewisiadau ffordd o fyw a phersonoliaethau. Rydym am i chi a'r person sydd wedi'i leoli gyda chi fwynhau eich amser gyda'ch gilydd a gweld manteision gweithio gyda ni.

Mae Fiona a Nigel, gofalwyr tymor hir Gabrielle, yn disgrifio’r gwaith fel rhywbeth sy’n “newid bywyd”, ac maen nhw'n cydnabod na allent wneud y gwaith heb gefnogaeth Cysylltu Bywydau Gorllewin Cymru, gan ei fod yn rhoi incwm cyson iddynt. Dywedodd Fiona “Ni allech chi wneud hyn fel swydd yn unig, mae'n rhaid i chi deimlo bod hyn yn rhywbeth rydych chi eisiau ei wneud. Mae [Gabrielle] yn rhan fawr iawn o'n teulu ac mae ein teulu i gyd yn agos iawn ati.”

Mae Emily, a ddaeth yn ofalwr seibiant byr yn ddiweddar, yn ei weld fel ffordd o helpu pobl, ynghyd â gallu gweithio'n hyblyg. Mae Sarah, sy’n aros gydag Emily o bryd i'w gilydd, yn disgrifio sut mae’r berthynas ag Emily a gofalwyr Cysylltu Bywydau eraill wedi rhoi hwb i’w hyder, gan nodi mai dyma “y peth gorau sydd wedi digwydd i mi erioed”.

Dyma rai agweddau ar sut beth yw bod yn ofalwr Cysylltu Bywydau:

• Cysylltiad personol a pherthnasoedd: Fel gofalwr Cysylltu Bywydau, mae gennych gyfle i ddatblygu perthynas ddofn ac ystyrlon gyda'r unigolyn rydych yn ei gefnogi. Rydych chi'n dod yn aelod o'r teulu estynedig ac yn rhoi ymdeimlad o berthyn a chysylltiad iddynt.
• Creu amgylchedd cefnogol: Rydych yn helpu i greu amgylchedd meithringar a chynhwysol yn eich cartref eich hun. Rydych yn cynnig man diogel a chroesawgar lle gall yr unigolyn fyw a ffynnu, gan sicrhau ei lesiant corfforol, emosiynol a chymdeithasol.
• Gofal a chymorth unigol: Mae gan bob person anghenion gofal unigryw, ac fel gofalwr Cysylltu Bywydau, rydych yn darparu cymorth personol wedi'i deilwra i'w ofynion penodol. Gall hyn gynnwys cynorthwyo gyda gweithgareddau dyddiol, cyllidebu, gofal personol, rheoli meddyginiaeth, paratoi prydau bwyd, a hwyluso cyfranogiad cymunedol.
• Hyrwyddo annibyniaeth a grymuso: Byddwch yn canolbwyntio ar hybu annibyniaeth yr unigolyn rydych chi'n ei gefnogi. Byddwch yn annog ac yn grymuso unigolion i wneud dewisiadau, datblygu sgiliau, a chymryd rhan mewn prosesau gwneud penderfyniadau hyd eithaf eu gallu.
• Hyblygrwydd a'r gallu i addasu: Mae bod yn ofalwr Cysylltu Bywydau yn gofyn i chi fod yn hyblyg ac yn barod i addasu. Efallai y bydd angen i chi addasu eich arferion, darparu cymorth ar wahanol adegau o'r dydd neu'r nos, ac ymateb i anghenion neu sefyllfaoedd sy'n newid.
• Hyfforddiant a chymorth: Mae cynlluniau Cysylltu Bywydau yn darparu hyfforddiant, arweiniad a chymorth parhaus i ofalwyr. Mae hyn yn helpu i sicrhau bod gennych y sgiliau, y wybodaeth a’r adnoddau angenrheidiol i ddarparu gofal o safon ac ymdrin ag unrhyw heriau a all godi.
• Cydweithio a gwaith tîm: Byddwch yn aml yn cydweithio â gweithwyr proffesiynol eraill sy'n ymwneud â gofal a chymorth yr unigolyn, megis gweithwyr cymdeithasol neu ddarparwyr gofal iechyd. Mae'r gwaith tîm hwn yn helpu i greu ymagwedd gyfannol a chydlynol at gymorth a llesiant yr unigolyn.
• Dysgu parhaus a thwf personol: Mae bod yn ofalwr Cysylltu Bywydau yn cynnig cyfleoedd ar gyfer eich twf personol a dysgu. Byddwch yn cael cipolwg gwerthfawr ar wahanol brofiadau a safbwyntiau, yn datblygu sgiliau newydd mewn rhoi gofal a chyfathrebu, ac yn gwella eich dealltwriaeth o anghenion a galluoedd amrywiol.

Mae'n bwysig nodi y gall heriau fod yn rhan o swydd gofalwr Cysylltu Bywydau a bydd gofyn am amynedd, empathi a gwytnwch. Fodd bynnag, mae llawer o ofalwyr yn cael llawer o foddhad o gael effaith gadarnhaol ar fywyd person a chyfrannu at ei hapusrwydd a'i lesiant cyffredinol.

Pa rinweddau a phriodweddau personol yr ydyn ni’n chwilio amdanynt?

Dylai gofalwyr Cysylltu Bywydau feddu ar rinweddau megis y canlynol;

• Empathi
• Amynedd
• Sgiliau cyfathrebu da
• Gwir ddiddordeb mewn cefnogi eraill
• Tosturi
• Dealltwriaeth
• Hyblygrwydd

Mae'r rhain i gyd yn nodweddion pwysig wrth ddarparu gofal o safon.

Pa brofiad perthnasol ydyn ni'n edrych amdano?

Gall profiad blaenorol mewn rolau gofalu, megis cefnogi unigolion ag anableddau, oedolion hŷn, neu unigolion â chyflyrau iechyd meddwl, fod yn fanteisiol. Mae'r profiad hwn yn helpu i ddangos eich dealltwriaeth o'r anghenion a'r heriau sy'n gysylltiedig â chefnogi unigolion â gofynion gofal.

Hyfforddiant a datblygiad

Rydym yn darparu cyrsiau hyfforddi a all wella eich sgiliau a'ch gwybodaeth mewn meysydd megis diogelu, cymorth cyntaf, rhoi meddyginiaeth, a chyflyrau neu anableddau penodol.

Gwiriadau cefndir a gofynion diogelwch

Mae Cysylltu Bywydau yn blaenoriaethu diogelwch a llesiant unigolion agored i niwed. Fel rhan o'r broses gwneud cais, bydd gofyn i chi gael gwiriadau cefndir, megis gwiriad gan y Gwasanaeth Datgelu a Gwahardd (DBS) i sicrhau nad oes cofnodion troseddol neu bryderon diogelu.

Beth yw’r broses ar gyfer dod yn ofalwr Cysylltu Bywydau?

I ddod yn ofalwr Cysylltu Bywydau, byddwch yn mynd trwy broses ymgeisio ac asesu ar-lein strwythuredig sy'n gallu cymryd hyd at flwyddyn.

1. Cysylltwch â ni! Byddwch yn siarad â'n tîm cyfeillgar at Cysylltu Bywydau.
2. Byddwn yn ateb eich holl gwestiynau ac yn rhoi gwybodaeth i chi am y cynllun Cysylltu Bywydau ac yn asesu eich addasrwydd cychwynnol. Gall hyn gynnwys cyfarfod rhagarweiniol neu alwad ffôn i drafod eich cymhellion, profiad, a gofynion y rôl.
3. Byddwn yn anfon pecyn ymgeisio atoch! Bydd gofyn i chi lenwi ffurflen gais, gan roi manylion amdanoch chi eich hun, eich aelwyd, ac unrhyw brofiad neu sgiliau perthnasol sydd gennych. Bydd angen i chi hefyd gael gwiriadau cefndir, a all gynnwys gwiriad gan y Gwasanaeth Datgelu a Gwahardd (DBS) neu gyfwerth, er mwyn sicrhau diogelwch unigolion agored i niwed.
4. Ymweliad cartref ac asesiad! Bydd aseswr o’r cynllun Cysylltu Bywydau yn cynnal ymweliad cartref i werthuso pa mor addas ydych i fod yn ofalwr Cysylltu Bywydau. Bydd yn asesu eich amgylchedd byw, yn trafod eich galluoedd cymorth, ac yn ystyried pa mor dda y gall eich cartref ddiwallu anghenion unigolyn â gofynion gofal.
5. Hyfforddiant a pharatoi! Rydym yn darparu sesiynau hyfforddiant a pharatoi i ddarpar ofalwyr. Mae'r sesiynau hyn yn ymdrin â phynciau fel diogelu, sgiliau cyfathrebu, deall anghenion unigol a meysydd perthnasol eraill. Mae’r hyfforddiant hwn yn helpu i roi’r wybodaeth a’r sgiliau sydd eu hangen arnoch i ddarparu gofal a chymorth effeithiol.
6. Paru a chymeradwyaeth! Ar ôl i chi gwblhau'r broses asesu a hyfforddiant yn llwyddiannus, bydd y cynllun yn eich paru ag unigolyn y mae ei anghenion a’i ddewisiadau’n cyd-fynd â’ch galluoedd ac amgylchedd y cartref. Nod y broses baru hon yw sicrhau cydnawsedd a'r ffit orau posibl.
7. Cefnogaeth a goruchwyliaeth barhaus! Fel gofalwr Cysylltu Bywydau, byddwch yn derbyn cefnogaeth barhaus, goruchwyliaeth ac arweiniad gennym ni yn Cysylltu Bywydau Gorllewin Cymru. Mae hyn yn cynnwys ymweliadau rheolaidd, cyfarfodydd adolygu, a mynediad at rwydweithiau cymorth neu grwpiau cyfoedion i'ch helpu i lywio unrhyw heriau a pharhau â'ch datblygiad proffesiynol.

Pwy allaf gysylltu â i gael rhagor o wybodaeth am ddod yn ofalwr Byw gyda Chymorth?

Cysylltwch â ni

Gallwch gysylltu â ni drwy ddefnyddio'r manylion isod:

Rhif Ffôn: 01267 246890

E-bost: westwalessharedlives@sirgar.gov.uk

Ffurflen Cyswllt

Cwestiynau Cyffredin am dod yn ofalwr Cysylltu Bywydau

Darganfod mwy am dderbyn y gwasanaeth