Holiadur Preswylwyr Sir Gâr 2023

Byddwn yn rhannu gwybodaeth am ein perfformiad mewn perthynas â meysydd gwasanaeth allweddol yn fwy rheolaidd. Bydd y wybodaeth hon yn dryloyw ac yn ystyrlon.

Byddwn yn adolygu'r ffordd rydym yn rhannu gwybodaeth am sut rydym yn defnyddio ein hadnoddau.

Er mwyn datblygu cyd-ddealltwriaeth ac ymddiriedaeth rhyngom ni a chi, byddwn yn darparu mwy o wybodaeth sy'n nodi canlyniadau realistig sy'n ymwneud â'r hyn y gallwn ei gyflawni a phryd y gallwn ei gyflawni. Byddwn yn cyfathrebu hyn yn glir ac mewn modd amserol.

Fel rhan o'r arolwg, fe ofynnon ni ym mha rannau o'r sir rydych chi'n byw. Mae hyn wedi ein galluogi i ddeall pa ardaloedd y mae materion penodol yn gysylltiedig â nhw. Yn bwysicaf oll, gallwn nawr ganolbwyntio ein hymdrechion ar rai o'r prif ardaloedd o ran angen, sy'n sicrhau ein bod yn defnyddio ein hadnoddau yn y ffordd gywir.

Dyma rai o'r materion allweddol a amlygwyd gennych:

• Mae'r argyfwng costau byw yn her sylweddol i chi a'ch teuluoedd.
• Canol Trefi h.y. Rhydaman, Caerfyrddin a Llanelli yn edrych yn ddi-raen a bod angen sylw arnynt mewn perthynas â glanweithdra.
• Canol trefi yn ymddangos eu bod yn cael eu hesgeuluso o ran buddsoddiad economaidd, h.y. siopau gwag, diffyg swyddi lleol ac ati.

Mae canolfannau Hwb y Cyngor ar draws y sir a 'Hwb Fach y Wlad' yn darparu cymorth ac arweiniad i drigolion sydd â phryderon yn ymwneud â'r argyfwng costau byw. Mae'r ddarpariaeth hon yn un elfen o Gynllun Trechu Tlodi ehangach y Cyngor.

Nod ein menter newydd 'Tîm Tacluso', 'Tacluso ein trefi' yn ceisio gwella glendid a golwg canol ein trefi. Mae'r fenter yn cynnwys rhaglen waith a fydd yn cael ei chynnal dros y misoedd nesaf.

Mae gweledigaeth economaidd newydd yn cael ei datblygu ar hyn o bryd ar gyfer y Sir. Bydd y themâu a drafodir yn cynnwys creu swyddi, cymorth i fusnesau, denu buddsoddiad a manteisio ar dueddiadau a thechnolegau newydd a datblygol i annog twf economaidd.

Mae nifer o'r materion a amlygwyd gennych yn gymhleth a sylweddol ac felly mae'n briodol i'w harchwilio ymhellach drwy barhau i ymgysylltu â chi a rhanddeiliaid eraill i ddatblygu datganiadau sefyllfa, grwpiau gorchwyl a gorffen neu weithio mewn partneriaeth.

Mae hyn yn arbennig o berthnasol i'r themâu canlynol:

• Mynediad i iechyd a gofal cymdeithasol, a chymorth iechyd meddwl a llesiant,
• Mynediad i gysylltiadau trafnidiaeth a thrafnidiaeth gyhoeddus addas i'r diben,
• Tai fforddiadwy sydd ar gael.

Byddwn yn cydweithio â phartneriaid i ddatblygu strategaeth atal a chynllun gweithredu ar gyfer gofal cymdeithasol i oedolion er mwyn sicrhau bod pobl yn cael y cymorth iawn ar yr adeg iawn.

Mae Fframwaith Atal Cymunedol wedi’i lansio sy’n darparu un pwynt cyswllt i gefnogi lles. Mae yna hefyd blatfform digidol ‘Cysylltu Sir Gâr’ sydd wedi’i gynllunio i ddarparu gwybodaeth am wasanaethau cymorth, gwybodaeth leol a digwyddiadau cymunedol ar draws y Sir.

Byddwn yn gweithio gyda'r Bwrdd Iechyd i ddarparu lefelau hygyrch a phriodol o gymorth i bawb sydd â phroblemau Iechyd Meddwl gan ehangu mynediad a chymorth i Blant ac Oedolion Agored i Niwed.

Rydym yn ymchwilio i ddatblygu Strategaeth Trafnidiaeth Gymunedol ar gyfer y sir.

Mae'r Cynllun Cyflawni ar gyfer Adfywio a Datblygu Tai yn cadarnhau ein hymrwymiad i gynyddu'r cyflenwad o dai fforddiadwy o ansawdd da ac ynni-effeithlon.

Byddwn yn:

• adeiladu tai Cyngor newydd, ailddefnyddio tai gwag,
• cynyddu ein stoc dai drwy brynu cartrefi sector preifat ar y farchnad agored,
• gweithio gyda'n partneriaid Cymdeithasau Tai a'u cefnogi i adeiladu mwy o dai yn y Sir,
• rheoli tai preifat yn fewnol drwy ein Hasiantaeth Gosod Syml,
• darparu tai fforddiadwy i'w perchnogi ar gost isel drwy'r system gynllunio.