Fy Nghyfrifon

Cross Hands

Mae Cross Hands yn 'Barth Twf' allweddol i economi Sir Gaerfyrddin, gan wasanaethu fel hwb ar gyfer buddsoddi strategol a datblygu o ran defnyddio tir ar gyfer tai, cyflogaeth a dibenion masnachol.

Yn wahanol i'r deg tref gwledig sy'n rhan o fenter y Deg Tref, mae Cross Hands yn ganolbwynt hirdymor ar gyfer buddsoddiad ar raddfa rhanbarthol mewn seilwaith a nifer o barthau twf, gan gynnwys Gorllewin Cross Hands, y Parth Bwyd, a Safle Strategol Dwyrain Cross Hands. Mae'r meysydd hyn wedi'u targedu at sectorau allweddol fel gwyddorau bywyd, gweithgynhyrchu uwch, technolegau amgylcheddol, diwydiannau creadigol, a thechnolegau bwyd-amaeth.

O ganlyniad, mae Cross Hands a'r ardaloedd cyfagos yn wynebu llai o heriau economaidd-gymdeithasol o gymharu â chymunedau gwledig eraill. Mae'r boblogaeth yn y rhanbarth wedi tyfu'n sylweddol yn ystod y blynyddoedd diwethaf, gan gefnogi demograffig iau gyda chyfraddau gweithgarwch economaidd uwch a lefel uwch o gyflogaeth llawn amser.

Darganfod Cross Hands

Prosiect Deg Tref

Cymeradwyodd tîm Twf Cross Hands gais gan Fenter Cwm Gwendraeth Elli ar gyfer Swyddog Ieuenctid a Chymuned sydd wedi'i leoli yn Cross Hands. Yn dilyn y gymeradwyaeth hon, llwyddodd Menter Cwm Gwendraeth Elli, ynghyd â nifer o wirfoddolwyr, i wneud gwelliannau hanfodol i Festri Capel Tabor. Ers hynny mae'r gofod wedi'i adnewyddu wedi dod yn hwb ar gyfer gweithgareddau ieuenctid a chymuned yn Cross Hands, yn ogystal ag i ysgolion.
Bydd Cross Hands yn elwa o fod yn rhan o brosiect a gomisiynwyd gan yr Awdurdod, sy'n canolbwyntio ar greu celf yn y dref gan ddefnyddio cynhyrchion gwastraff.
Yn ogystal, mae Steve Jenkins, yr artist stryd o Sir Gaerfyrddin, wedi paentio murluniau yn y dref sy'n seiliedig ar ei hanes a'i threftadaeth. Ar ochr Squires and Lane Hair Academy and Salon, mae'r murlun yn cynnwys darluniau du a gwyn o waith cloddio, gan gynnwys Lamp Glöwr Mynydd Mawr, a Britheg y Gors lachar i ychwanegu sblash o liw.

 

 

 

Adfywio Canol Trefi Gwledig

Mae trafodaethau â pherchnogion busnes y stryd fawr ar draws pob un o'r Deg Tref wedi arwain at ddatblygu'r Gronfa Adfywio Canol Trefi Gwledig i gefnogi safleoedd busnes ar y stryd fawr i adnewyddu, gwella ac ychwanegu bywiogrwydd i flaen eu siopau. Cafodd safleoedd ar y stryd fawr gyllid i wella tu allan eu hadeiladau, er mwyn sicrhau bod y dref yn fywiog ac yn edrych yn well.

Deg Tref yn mynd i'r Afael â Threfi

Heol Llandeilo oedd canolbwynt y prosiect Mynd i'r Afael â Threfi yn Cross Hands. Mae wyneb newydd wedi'i osod ar y palmentydd ar ran isaf Heol Llandeilo, a oedd mewn cyflwr gwael. Yn ychwanegol, cafodd y ddau arhosfan bysiau ar y ddwy ochr eu gwella er mwyn rhoi mynediad i ddefnyddwyr anabl, gyda chysgodfannau bysiau newydd a phlannu ar raddfa fach.

Cymunedau Cynaliadwy

Bydd y prosiect hwn yn rhoi cymorth cymunedol a chyfeillgarwch i rieni a gofalwyr pobl ifanc sy'n byw ag awtistiaeth. Bydd y cyllid yn galluogi teuluoedd i ryngweithio'n gadarnhaol ynghylch gweithgareddau amlsynhwyraidd a bydd ymweliadau â lleoliadau lleol yn cael eu trefnu.

Bydd gweithwyr proffesiynol a staff arbenigol yn rhan o'r prosiect i rannu gwybodaeth a chyfeirio at ddarpariaeth y gellir ei chyrchu.

 

Cronfa ARFOR

Mae dau fusnes yn Cross Hands wedi llwyddo i sicrhau cyllid o raglen Arfor. Roedd un busnes yn canolbwyntio ar ddiogelu at y dyfodol drwy gael cefnogaeth i aelod o staff sy'n siarad Cymraeg, gan alluogi gweithrediadau dwyieithog. O ganlyniad, mae 1.5 o swyddi newydd wedi'u creu, gan ganiatáu i'r busnes weithredu'n fwy effeithiol yn y Gymraeg a'r Saesneg.

Cafodd y busnes arall gyllid ar gyfer offer newydd, a oedd yn cefnogi'r gwaith o ddatblygu cangen newydd i fynd i'r afael â bwlch yn y farchnad leol. Mae'r cymorth hwn wedi creu dwy swydd newydd, gan ganiatáu i'r busnes gynnig gwasanaethau atgyweirio yn y cartref a'r busnes i'r holl gwsmeriaid.

Hwb