Trwyddedu

Ar hyn o bryd rydym yn gweithredu dau gynllun trwyddedu ar gyfer eiddo a gaiff eu rhentu’n breifat yn Sir Gaerfyrddin – sef cynllun trwyddedu gorfodol ar gyfer tai amlfeddiannaeth a chynllun trwyddedu dethol sy’n benodol ar gyfer Ward Tŷ-isa yn Llanelli.

I fod yn landlord trwyddedig mae’n rhaid i chi basio prawf ‘person addas a phriodol’. Ni fydd modd i landlordiaid sydd â rhai euogfarnau feddu ar drwydded ac mae’n rhaid iddynt enwebu rhywun arall syn addas ac yn briodol i reoli’r eiddo ar eu rhan.

Trwyddedu gorfodol Tai Amlfeddiannaeth (HMO)

Mae hyn yn berthnasol i Dai Amlfeddiannaeth sy’n cynnwys tair neu fwy o loriau ac sydd â phump neu fwy o feddianwyr nad ydynt yn ffurfio aelwyd unigol. Mae nifer y lloriau’n cynnwys isloriau y gellir byw ynddynt ac atigau a hefyd yn cynnwys llawr gwaelod masnachol â thŷ amlfeddiannaeth uwch ei ben ee mae siop llawr gwaelod â thŷ dau lawr a rennir uwch ei phen yn cyfrif fel eiddo tri llawr. Mae trwyddedu gorfodol yn berthnasol i’r Sir gyfan.

Ffioedd trwydded ar gyfer Tai Amlfeddiannaeth (HMO)

Cynllun Trwyddedu Dethol

Nid yw trwyddedu dethol yn uniongyrchol gysylltiedig â thai amlfeddiannaeth. Gallai cynlluniau gael eu cyflwyno mewn ardaloedd lle nad oes galw mawr am dai neu mewn ardaloedd lle y ceir llawer iawn o broblemau yn sgil ymddygiad gwrthgymdeithasol. Gall problemau o’r fath, sy’n aml yn cael eu creu gan nifer bach iawn o landlordiaid neu denantiaid, gael effaith sylweddol mewn ardal. Diben trwyddedu dethol, o’r herwydd, yw helpu i wella ardaloedd o’r fath. Mae’n rhaid i bob eiddo a gaiff ei rentu’n breifat o fewn ardal trwyddedu dethol fod wedi’i drwyddedu, os yw’n dŷ amlfeddiannaeth ai peidio.

Mae un Cynllun Trwyddedu Dethol ar waith gennym ar hyn o bryd yn ward Tŷ-isa yn Llanelli. Bydd y cynllun hwn yn parhau hyd 2 Gorffennaf 2019, ac mae’n ategu Polisi Gosodiadau Lleol sydd hefyd yn bodoli ar gyfer tai cyngor yn Nhy-isa. Cyn cyflwyno Cynllun Trwyddedu Dethol mae’n rhaid ymgynghori â landlordiaid lleol ac yna cyhoeddi’r wybodaeth ar ôl i benderfyniad gael ei wneud.

Os ydych yn ddeiliad trwydded o fewn Cynllun Trwyddedu Dethol mae cyfrifoldeb arnoch i sicrhau nad yw eich tenantiaid yn achosi problemau o fewn ffiniau eich eiddo yn sgil ymddygiad gwrthgymdeithasol.

Os ydych yn ddeiliad trwydded o fewn Cynllun Trwyddedu Dethol mae cyfrifoldeb arnoch i sicrhau nad yw eich tenantiaid yn achosi problemau o fewn ffiniau eich eiddo yn sgil ymddygiad gwrthgymdeithasol.

Gall ymddygiad gwrthgymdeithasol gynnwys cerddoriaeth uchel a phartïon neu sbwriel nad yw’n cael ei roi allan yn briodol i’w gasglu. Er mai chi fydd yn gyfrifol yn y lle cyntaf am geisio ymdrin â materion o’r fath, byddwn ni, yr heddlu ac asiantaethau eraill yn gallu eich helpu i ymdrin ag ymddygiad gwrthgymdeithasol.

Ffioedd ar gyfer trwyddedau o fewn ardal Cynllun Trwyddedu Dethol

Eithriadau

Mae rhai mathau o eiddo wedi’u heithrio rhag trwyddedu, gan gynnwys llety prifysgol. Efallai y byddwn hefyd yn arfer ein disgresiwn er mwyn rhoi hysbysiad eithrio dros dro. Gall eithriadau dros dro gael eu caniatáu os ydych chi, fel landlord eiddo a gaiff ei rentu’n breifat, yn cymryd camau i newid y sefyllfa fel na fydd bellach angen i’r eiddo gael ei drwyddedu.