Strategaeth Ddraft y Rhaglen Moderneiddio Addysg

Alinio Strategol (Yr Edau Euraidd)

Fel y nodwyd eisoes, mae datblygiad y RhMA yn seiliedig ar egwyddor dull cyfannol a'r gofyniad i wella a chefnogi ystod o amcanion cenedlaethol, corfforaethol ac addysgol. Mae datblygiad y RhMA yn cyd-fynd â dogfennau a pholisïau cenedlaethol a lleol allweddol fel yr amlinellir isod:

Cenedlaethol

• Cymraeg 2050
• Cwricwlwm i Gymru
• Deddf Anghenion Dysgu Ychwanegol a’r Tribiwnlys Addysg (Cymru) 2018
• Cod Anghenion Dysgu Ychwanegol Cymru 2021
• Deddf Cydraddoldeb 2010
• Deddf Llesiant Cenedlaethau'r Dyfodol (Cymru) 2015

Lleol

• Strategaeth Gorfforaethol 2022-2027
• Gweledigaeth y Cabinet 2022-2027
• Addysg Sir Gâr 2022-2032
• Cynllun Strategol y Gymraeg mewn Addysg 2022-2032
• Carbon Sero Net/Argyfwng Hinsawdd
• Cynllun Ariannol Tymor Canolig

Mae gan y Rhaglen Moderneiddio Addysg ran amlwg yn Strategaeth Gorfforaethol 2022-2027 y Cyngor sy'n pennu’r cyfeiriad i’r awdurdod lleol dros y pum mlynedd nesaf, gan ymgorffori ein nodau gwella a llesiant fel y’u diffinnir gan ddeddfwriaeth:

Amcan Llesiant 1- Galluogi ein plant a'n pobl ifanc i gael y dechrau gorau posibl mewn bywyd (Dechrau'n Dda).

Yn y dyfodol bydd y Gwasanaethau Addysg yn canolbwyntio ar gynorthwyo dysgwyr i ddod:

• Yn ddysgwyr uchelgeisiol, galluog sy’n barod i ddysgu drwy gydol eu hoes.
• Yn gyfranwyr mentrus, creadigol sy’n barod i chwarae eu rhan yn llawn yn eu bywyd a’u gwaith.
• Yn unigolion iach, hyderus sy’n barod i fyw bywyd gan wireddu eu dyheadau fel aelodau gwerthfawr o gymdeithas.
• Yn ddinasyddion egwyddorol, gwybodus yng Nghymru a'r byd.

Mae gan y Rhaglen Moderneiddio Addysg rôl sylweddol i'w chwarae yn Natganiad Gweledigaeth y Cabinet 2022-2027.

Mae Gweledigaeth y Cabinet ar gyfer Addysg yn amlinellu ystod o ymrwymiadau y byddant yn gweithio tuag at eu cyflawni yn ystod y weinyddiaeth hon. Mae'r ymrwymiadau hyn yn cynnwys:

• Parhau i fuddsoddi mewn adeiladau ysgolion ar draws y sir ac ailwampio Rhaglen Cymunedau Dysgu Cynaliadwy Sir Gaerfyrddin i ddiwallu anghenion yr 21ain ganrif. Sicrhau bod pob ysgol newydd yn bodloni'r safonau gofynnol o ran inswleiddio ac awyru er mwyn lleihau biliau ynni a bod yn fwy cydnaws â'r amgylchedd.
• Ceisio sicrhau bod mwy o leoliadau addysg blynyddoedd cynnar a gofal plant ar gael ledled y sir, yn enwedig mewn ardaloedd gwledig; gan ganolbwyntio'n benodol ar ddarparu a chryfhau gofal plant trwy gyfrwng y Gymraeg ym mhob ardal.
• Parhau i sicrhau bod disgyblion ag anghenion dysgu ychwanegol (ADY) yn cael eu cefnogi'n llawn i gyflawni eu potensial yn unol â Diwygio ADY.
• Gweithio ochr yn ochr ag ysgolion i gynyddu cyfraddau presenoldeb mewn ysgolion a gwella mynediad i addysg ar gyfer disgyblion sy'n agored i niwed.
• Cynyddu'r defnydd o gyfleusterau ysgol sydd i'w defnyddio gan y gymuned y tu allan i oriau addysgu.
• Gweithio gydag ysgolion i gyflwyno cwricwlwm llawn a chyflawn sy'n anelu at godi safonau addysgol a sicrhau bod disgyblion yn deall ac yn dathlu eu hanes, eu daearyddiaeth a'u diwylliant lleol.
• Yn unol â gweledigaeth Llywodraeth Cymru, darparu prydau ysgol am ddim, sy'n faethlon ac o ansawdd uchel, i bob disgybl ysgol gynradd, dros oes y weinyddiaeth.
• Cefnogi'r gwaith o ddarparu cyfleoedd i drigolion y sir gymryd rhan mewn dysgu hanfodol mewn sgiliau llythrennedd, rhifedd a digidol, yn unol â chyllid cyfredol Llywodraeth Cymru. Galluogi dysgwyr ôl-16 i wella eu sgiliau ar gyfer cyflogaeth a dilyniant, yn ogystal â dysgu gydol oes a budd i'r gymuned a chynnig amgylcheddau dysgu o ansawdd uchel i ddysgwyr yn yr 21ain ganrif.
• Sicrhau bod safon y dysgu a'r addysgu yn ein hysgolion o ansawdd uchel i gynorthwyo ein dysgwyr i wneud cynnydd priodol.
• Yn unol â rhaglen Llywodraeth Cymru, sicrhau bod mwy o addysg ddwyieithog a chyfrwng Cymraeg ar gael yn ein hysgolion, ar ôl ymgynghori'n drylwyr â rhieni, cyrff llywodraethu ysgolion, dysgwyr a'r gymuned leol.
• Gweithio gyda Llywodraeth Cymru i ystyried effeithiolrwydd dyfeisiau awyru gwrth-covid mewn ysgolion.

I ategu gweledigaeth y Cabinet, mae'r Adran Addysg a Phlant wedi datblygu Gweledigaeth a Phwrpas Moesol Cyfunol:

Byddwn yn cefnogi holl ddysgwyr Sir Gaerfyrddin. Byddwn yn sicrhau eu bod yn hapus, yn ddiogel ac yn ffynnu, a'u bod yn cyflawni eu potensial personol a chymdeithasol a'u potensial o ran dysgu. Byddwn yn ymdrechu i fod y gorau y gallwn fod ac yn uchel ein parch yn lleol, yn ogystal ag ennill cydnabyddiaeth genedlaethol a rhyngwladol.'

Pwrpas Moesol
Sicrhau bod pob dysgwr yn cael ei werthfawrogi a'i werthfawrogi'n gyfartal.

Yn Sir Gaerfyrddin rydym yn ymdrechu i roi'r profiad addysg gorau posibl i'n dysgwyr. Mae strategaeth Addysg Sir Gâr 2022-2032 yn nodi gweledigaeth glir ar y cyd ar gyfer y rôl y mae gwasanaethau addysg yn ei chwarae o ran datblygu cymunedau bywiog ac economi lewyrchus yn Sir Gaerfyrddin yn y dyfodol.

Ein deilliannau a ddymunir 2022-2032

Rydym yn ymdrechu i ddatblygu'r plentyn/person ifanc cyfan gan roi'r sgiliau a'r wybodaeth sydd eu hangen arnynt ar gyfer y cam nesaf yn eu llwybr dysgu neu yrfa ddysgu.

Rydym yn ceisio cyflawni hyn ar adeg pryd mae galw cynyddol am ein hadnoddau a mwy o ffocws ar wella deilliannau a chyrhaeddiad. Yn y pen draw, rydym am sicrhau bod ein dysgwyr wedi'u haddysgu'n dda, yn wybodus ac yn meddu ar gymwysterau da.

Fel adran mae gennym flaenoriaethau clir sy'n canolbwyntio ar bedair thema allweddol, sydd ynghlwm wrth Addysg yng Nghymru: Ein Cenhadaeth Genedlaethol. Byddwn yn cyflawni ein deilliannau a ddymunir drwy wireddu ein 'darnau diben' a delfrydau'r Cwricwlwm newydd i Gymru.

Dysgwyr Sir Gaerfyrddin-

• Yn ddysgwyr uchelgeisiol, galluog sy’n barod i ddysgu drwy gydol eu hoes.
• Yn unigolion iach, hyderus sy’n barod i fyw bywyd gan wireddu eu dyheadau fel aelodau gwerthfawr o gymdeithas.
• Yn gyfranwyr mentrus, creadigol sy’n barod i chwarae eu rhan yn llawn yn eu bywyd a’u gwaith.
• Yn ddinasyddion egwyddorol, gwybodus yng Nghymru a'r byd.

Darnau Diben

Byddwn yn cyflawni ein deilliannau a ddymunir drwy wireddu ein 'darnau diben'.

Darnau diben

1. Byddwn yn rhoi'r dechrau gorau mewn bywyd i bob plentyn, gan wella eu profiadau bywyd cynnar a sicrhau eu bod yn byw bywydau iach. Byddwn yn amddiffyn plant a phobl ifanc rhag niwed ac yn gweithio i sicrhau eu lles emosiynol a chorfforol.
2. Byddwn yn cefnogi pob dysgwr wrth i ni adeiladu ar yr hyn y maent wedi'i ddysgu ac yn gwella eu cynnydd a chyflawniad. Byddwn yn   sicrhau canlyniadau priodol i BOB dysgwr  a  PHOB aelod o staff o fewn y system.
3. Byddwn yn sicrhau bod gan ein plant a'n pobl ifanc y sgiliau cywir i lwyddo ac i gyflawni eu huchelgeisiau. Byddwn yn datblygu sgiliau dysgwyr ymhellach gan gynnwys creadigrwydd, arloesedd, entrepreneuriaeth, annibyniaeth, gwydnwch a dyfalbarhad.
4. Byddwn yn cefnogi ein plant a'n pobl ifanc drwy fynd i'r afael â bylchau o ran cyfleoedd a chyflawniad.
5. Byddwn yn sicrhau bod pob person ifanc mewn Addysg, Cyflogaeth neu Hyfforddiant a'u bod yn dilyn llwybrau dysgu a gyrfa cynhyrchiol.
6. Byddwn yn datblygu cwricwlwm diddorol a phwrpasol a fydd yn cefnogi dysgwyr i wireddu eu potensial gan sicrhau eu bod yn cael eu 'Haddysgu'n Dda, yn Wybodus ac yn ennill Cymwysterau addas' sy’n eu galluogi i ddod yn ddinasyddion byd-eang effeithiol.
7. Byddwn yn datblygu 'cwricwlwm lleol' sy'n adlewyrchu hanes, daeryddiaeth a diwylliant unigryw Sir Gâr.
8. Byddwn yn hyrwyddo'r Gymraeg ac yn ymfalchïo yn nhreftadaeth a diwylliant unigryw Sir Gaerfyrddin.
9. Byddwn yn sicrhau bod ein dysgwyr yn datblygu dealltwriaeth o a pharch at amrywiaeth a chydraddoldeb.
10. Byddwn yn diogelu ac yn adfer yr amgylchedd ac yn newid ein ffyrdd o fyw er mwyn diogelu'r amgylchedd yn awr ac ar gyfer y dyfodol gan sicrhau bod ein plant a'n pobl ifanc yn datblygu gwerthfawrogiad o'u cymuned a'u hamgylchedd.
11. Byddwn yn gwerthfawrogi cyflawniad ein dysgwyr ac yn dathlu eu llwyddiant.
12. Byddwn yn gweithio fel UN TȊM er lles ein plant, pobl ifanc a theuluoedd
13. Byddwn yn cefnogi ein plant a'n pobl ifanc drwy recriwtio, datblygu, cadw a gwerthfawrogi'r arweinwyr, athrawon a staff cymorth gorau. Byddwn yn parchu ac yn cydnabod ein holl staff ac yn ymrwymo i sicrhau eu lles.
14. Byddwn yn sicrhau bod llais y dysgwr yn ganolog i'n penderfyniadau a bod Hawliau'r Plentyn yn cael eu hyrwyddo a'u cyflawni.
15. Byddwn yn cynnig safonau uchel o addysg ddwyieithog, yn gynyddol mewn amgylcheddau modern sydd â'r adnoddau llawn ar gyfer dysgu yn yr 21ain ganrif gan ddefnyddio technoleg i gefnogi addysgu a dysgu a gwella gwasanaethau.
16. Byddwn yn datblygu fel sefydliad sy'n dysgu er budd ein plant, ein pobl ifanc a'n staff.
17. Byddwn yn cynnwys plant a phobl ifanc yn y gwaith o gynllunio a monitro ein gwasanaethau.
18. Byddwn yn datblygu ac yn cryfhau gweithio mewn partneriaeth ymhellach gydag adrannau ac asiantaethau eraill.
19. Byddwn yn adnabod ein gwasanaethau'n dda a sicrhau newid a gwelliant cadarnhaol parhaus
20. Bydd ein gwasanaethau, boed yn cael eu darparu'n uniongyrchol neu wedi'u comisiynu gan eraill, yn deg, yn gynhwysol, yn anelu at ragoriaeth ac yn cynnig gwerth da am arian.

Mae dyheadau Strategaeth Gorfforaethol 2022-2027, Gweledigaeth y Cabinet 2022-2027, Addysg Sir Gâr 2022-2032 ac adborth yn sgil ymgysylltu â phenaethiaid Sir Gaerfyrddin wedi'u crynhoi yn 8 Blaenoriaeth Addysg yr adran ar gyfer 2022-2025:

Cynhwysiant ac Ymgysylltu - Sicrhau system addysg ragweithiol,gynhwysol.

Dysgu ac Addysgu - Sicrhau cynnydd ardderchog i bob dysgwr.

Diogelu'n Dysgwyr - Sicrhau bod plant a phobl ifanc yn hapus, yn ddiogel ac yn ffynnu, gan oresgyn tlodi.

Llesiant - Meithrin iechyd meddwl a chorfforol da iawn i bawb.

Arweinyddiaeth - Sicrhau bod Arweinyddddiaeth ysbrydoledig yn arwain at gynnydd rhagorol i bob dysgwr.

Cymunedau Cynaladwy - Cyflwyno safonau uchel o addysg mewn amgylcheddau cynyddol fodern a chynaliadwy.

Y Gymraeg - Sicrhau datblygiad dwyieithog ac amilieithog llwyddiannus i bawb.

Gweithrediadau Adrannol - Darparu gwasanaethau cefnogi o ansawdd uchel sy'n cael effaith ar effeithlonrwydd y system addysg.

Mae Grŵp Ffocws Strategol ar gyfer pob un o'r blaenoriaethau uchod i yrru pob blaenoriaeth yn ei blaen a'i chyflawni. Mae Grwpiau Ffocws Strategol yn cynnwys swyddogion yr Awdurdod Lleol a phenaethiaid ysgol ac maent yn darparu cyfleoedd pwysig i wella materion allweddol i'r system addysg mewn modd strategol, yn seiliedig ar flaenoriaethau lleol a chenedlaethol.

Mae'r Rhaglen Moderneiddio Addysg yn rhan o'r Grŵp Ffocws Strategol Cymunedau Cynaliadwy ac mae'n cefnogi'r cyfeiriad strategol i gyflawni blaenoriaethau'r Adran Addysg ac yn benodol y nod i: Darparu addysg o safonau uchel mewn amgylchedd sy'n canolbwyntio ar y gymuned sy'n fwyfwy modern a chynaliadwy.

Strategaeth y Rhaglen Moderneiddio Addysg

Mae adroddiad diweddaraf Estyn a gyhoeddwyd ym mis Medi 2023 yn nodi'r canlynol mewn perthynas ag amcanion a strategaeth addysgol yr awdurdod:

• Mae gan yr awdurdod strategaeth glir ar gyfer moderneiddio ac ad-drefnu’i ysgolion sy’n seiliedig ar egwyddorion ac amcanion cadarn. Mae’r strategaeth yn adlewyrchu dyhead yr awdurdod i greu ystod o ysgolion o ansawdd uchel, sy’n diwallu anghenion eu dysgwyr presennol ac yn y dyfodol. Mae cyswllt priodol rhwng amcanion y strategaeth moderneiddio ysgolion, amcanion llesiant y cyngor a chynllun deng mlynedd y gwasanaeth addysg. Mae hyn yn cynnwys y weledigaeth i sicrhau bod plant a phobl ifanc yn cael y dechrau gorau posibl mewn bywyd yn ogystal â gwneud eu cymunedau yn rhai sy’n ddiogel ac yn ffyniannus. Mae gan yr awdurdod gynlluniau penodol ar gyfer darparu cyfleusterau cymunedol i leihau effaith tlodi ar gyflawniad disgyblion a phobl ifanc.
• Mae ymrwymiad uwch arweinwyr yr awdurdod, Arweinydd y Cyngor a’r Aelod Cabinet sydd â chyfrifoldeb dros Addysg a Gwasanaethau Plant i wireddu’r strategaeth, yn nodwedd gadarnhaol. Maent yn cydweithio’n effeithiol gyda’r tîm moderneiddio ysgolion a rhanddeiliaid eraill i adolygu’r strategaeth er mwyn sicrhau ei bod yn cydblethu ac yn ymateb i ofynion cyfredol yr awdurdod. Er enghraifft, bu iddynt addasu’r strategaeth i gefnogi Cwricwlwm i Gymru, y Cynllun Strategol Cymraeg mewn Addysg (CSGA) 2022-32 ynghyd ag ymateb i heriau fel recriwtio arweinwyr ysgol mewn ardaloedd gwledig y sir.
• Fodd bynnag, mae oedi o ran gwneud penderfyniadau, gan gynnwys yn dilyn ymgynghoriadau ffurfiol, wedi golygu nad yw’r awdurdod wedi mynd i’r afael yn llawn â’u cynlluniau i ad-drefnu a moderneiddio addysg.

Mae'r strategaeth hon wedi'i datblygu i lywio'r gwaith o roi'r RhMA newydd ar waith yn y dyfodol.

Mae'r RhMA yn cael ei harwain gan gyfres o amcanion strategol:

• Datblygu rhwydwaith o ysgolion sy'n effeithiol yn addysgol ac sy'n defnyddio adnoddau'n effeithlon ac yn gynaliadwy yn y tymor hir.
• Datblygu patrwm darpariaeth er mwyn i bob lleoliad dysgu hwyluso addysg o ansawdd uchel ar gyfer ei holl ddysgwyr cofrestredig, a hynny naill ai fel sefydliad unigol neu fel rhan o ffederasiwn neu drefniant cydweithredol gyda lleoliadau neu ddarparwyr eraill.
• Creu amgylchedd ysgol sy'n caniatáu i bob plentyn ym mhob ysgol gyrchu cwricwlwm a chael profiadau addysgu sy'n eu cymell i gyflawni eu llawn botensial, yn ogystal â hwyluso rhaglen o weithgareddau allgyrsiol sy'n hyrwyddo eu lles corfforol ac emosiynol.
• Datblygu seilwaith ym mhob ysgol sy'n eu galluogi i ddarparu addysg yn yr 21ain ganrif, gan hwyluso'r gwaith o wireddu'r amcanion craidd ar gyfer codi safonau addysgol a chynnal perfformiad o safon uchel.
• Gweithio'n strategol o ran darparu buddsoddiadau cyfalaf, ac integreiddio hynny â rhaglen i resymoli'r ddarpariaeth ledled y rhwydwaith ysgolion er mwyn cyflenwi'r galw yn effeithiol.
• Ailadeiladu, ailfodelu, adnewyddu neu foderneiddio'r holl ysgolion sydd i'w cadw yn y tymor hir, er mwyn iddynt gydymffurfio, i'r graddau y mae hynny'n ymarferol, â'r safonau dylunio a fabwysiadwyd.
• Cyfrannu at gyflawni amcanion polisi ehangach, er enghraifft, adnewyddu ac adfywio cymunedol, ffyrdd iach o fyw ac ati, trwy ddatblygu seilwaith galluogi priodol.
• Gwella effeithlonrwydd a dichonoldeb addysgol y sector ysgolion trwy leihau nifer y lleoedd gwag i lefel resymol, a hwyluso, lle bo hynny'n ymarferol, y dewisiadau a fynegir gan rieni ac ymateb yn effeithiol i newidiadau demograffig.
• Datblygu seilwaith ysgolion sy'n gwbl hygyrch i bawb ac sy'n galluogi pob dysgwr i gyrchu addysg o ansawdd uchel, beth bynnag yw ei anghenion unigol.
• Datblygu atebion unigol a chydweithredol ar gyfer ysgolion sy'n cyfrannu at y system addysg gyfun ledled y sir.

I hwyluso'r gwaith o drawsnewid y rhwydwaith ysgolion yn y dyfodol, mae cyfres o egwyddorion wedi'u datblygu a fydd yn feincnod ar gyfer yr hyn y dylai fod gan bob ysgol gynradd yn Sir Gaerfyrddin, fel gofyniad sylfaenol.

Egwyddorion Addysg Gynradd Sir Gaerfyrddin

• Bydd arweinyddiaeth gynaliadwy, gydag arweinwyr sy'n rhydd i arwain a rheoli, heb unrhyw ymrwymiad addysgu parhaol.
• Ni fydd mwy na 2 grŵp blwyddyn ym mhob dosbarth addysgu
• Bydd digon o ddisgyblion i gynnal y trefniadau strwythurol uchod.
• Bydd ysgolion yn hyfyw yn ariannol o dan fframwaith ariannu Rheoli Ysgolion yn Lleol ac yn gallu gweithredu yn y tymor hir heb ddiffyg cyllidebol.
• Bydd mynediad at gyfleusterau addysgu awyr agored addas i wella dysgu a chefnogi lles corfforol ar draws yr ysgol.
• Byddant yn gwbl gynhwysol ac yn hygyrch i bawb.
• Bydd ganddynt gyfleusterau modern sy'n cefnogi dysgu digidol.
• Bydd ganddynt amgylchedd dysgu o safon uchel i gefnogi llesiant yr holl ddysgwyr a gwella cynnydd a chyflawniadau'r dysgwyr ar draws ystod eang o sgiliau a meysydd cwricwlwm.

Rhaid nodi:

• Fel rhan o unrhyw adolygiad, byddwn yn ystyried sut y gallwn wireddu Cynllun Strategol y Gymraeg mewn Addysg Sir Gaerfyrddin a gwella addysg cyfrwng Cymraeg.
• Os penderfynir cau ysgol cyfrwng Cymraeg, byddwn yn hwyluso ac yn cefnogi mynediad at ddarpariaeth cyfrwng Cymraeg arall.

Mae nodau strategol ac amcanion/buddion y RhMA wedi'u cynllunio i hyrwyddo ac ategu amrywiaeth o ddisgwyliadau, ochr yn ochr â'r Egwyddorion Addysgol, ac maent yn seiliedig ar chwe thema allweddol:

Adolygiad o'r Rhaglen Moderneiddio Addysg

Yn 2010 penderfynodd y Cyngor fod y RhMA yn cael ei hadolygu bob dwy flynedd neu fel y bo'n ofynnol, fel arall, er mwyn sicrhau'i bod yn cyd-fynd â therfynau amser rhaglen genedlaethol Ysgolion ar gyfer yr 21ain Ganrif (a ailenwyd yn Rhaglen Cymunedau Dysgu Cynaliadwy).

Ers ei sefydlu mae cynnal adolygiad rheolaidd yn nodwedd ganolog o'r RhMA er mwyn gallu cadw hyblygrwydd wrth wraidd y rhaglen i sicrhau ei bod yn gyfredol ac yn ymatebol i newidiadau yn y fframwaith polisi addysg a'i bod yn gallu diwallu anghenion cymdeithas sy'n datblygu'n gyson. Mae hyn hyd yn oed yn bwysicach yn yr hinsawdd bresennol/y cyfnod ar ôl y pandemig.

Mae meini prawf sydd wedi hen ymsefydlu, a ddatblygwyd ac a fabwysiadwyd yn lleol drwy ymgynghori ag arweinwyr ysgolion cynrychioliadol, wedi'u cytuno a'u mabwysiadu fel dangosyddion priodol hyfywedd ac angen am fuddsoddi. Mabwysiadwyd y rhain yn ffurfiol yn 2008 ac maent wedi llywio strwythur y Rhaglen Moderneiddio Addysg ers hynny. Mae'r meini prawf wedi cael eu hadolygu yn unol â newidiadau i strategaethau a pholisïau, yn ogystal â newidiadau i ffactorau allanol megis: pwysau/cyllidebau ariannol, ôl troed ysgolion, maint dosbarthiadau, recriwtio, cyflwr adeiladau yn dirywio a newidiadau demograffig i sicrhau eu bod yn cyd-fynd â dyheadau presennol ac yn y dyfodol.

Atodiad 3

Siart llif eglurhaol ar gyfer Adolygiad Strategol a Chynigion Statudol

Atodiad 2

Llywodraethu'r Rhaglen Moderneiddio Addysg

Mae'r fframwaith llywodraethu (a ddangosir isod) ar gyfer y Rhaglen Moderneiddio Addysg (fel rhan o Fwrdd y Rhaglen Moderneiddio Addysg a Chymunedau) bellach wedi hen sefydlu gan ddiffinio'r rolau a'r cyfrifoldebau'n glir.

Fframwaith Llywodraethu y Rhaglen Moderneiddio Addysg a Chymunedau

Rheolir rhaglenni gwaith yn unol â methodoleg PRINCE2 ac egwyddorion MSP, a rheolir prosiectau unigol yn unol â phecyn cymorth Rheoli Prosiectau Sir Gaerfyrddin, sy'n sicrhau eu bod yn cydymffurfio â Llawlyfr Grantiau i Brosiectau'r Awdurdod, y ddogfen Rheoli Cyfalaf a rheoliadau ariannol a chaffael.

Fe'u rheolir gan Swyddogion Prosiect y Rhaglen Moderneiddio Addysg a Swyddogion Dylunio Eiddo sy'n adrodd i'r Bwrdd Cyflawni Prosiect bob mis. Mae cynrychiolwyr o Adnoddau Dynol, Trafnidiaeth, Cyfreithiol, Moderneiddio Ysgolion, Cymunedau, Safonau ac Ansawdd, Cyllid, Anghenion Dysgu Ychwanegol a'r Amgylchedd yn aelodau o'r grŵp, ac mae swyddogion eraill yn cael eu cyfethol i'r tîm yn ôl yr angen.

Mae'r Bwrdd Cyflawni Prosiect yn cefnogi ac yn atebol i Fwrdd Rhaglen Moderneiddio Addysg a Chymunedau y Cyngor (a ymgorfforwyd yn 2017) am gyfeiriad a rheolaeth gyffredinol prosiectau. Yn y pen draw, Bwrdd y Rhaglen sy'n gyfrifol am sicrwydd bod prosiectau'n parhau i fod ar y trywydd iawn i gyflawni'r amcanion buddsoddi a ddymunir o'r ansawdd angenrheidiol i gyflawni'r agenda Cymunedau Dysgu Cynaliadwy. Mae ganddynt yr awdurdod ar gyfer y prosiect o fewn y cylch gwaith a bennwyd yn gorfforaethol gan y Cabinet a'r Cyngor Sir

Atodiad 3