Derbyn i Ysgolion 2025-2026- Gwybodaeth i Rieni

Cyflwyniad

Annwyl rieni a gwarcheidwaid,
Croeso i Sir Gaerfyrddin, lle mae taith ddysgu pob plentyn yn flaenoriaeth gyffredin. Fel awdurdod lleol, rydym yn falch o gynnig amgylchedd diogel, cefnogol a chynhwysol lle mae pob disgybl yn cael ei annog i ffynnu, i archwilio eu diddordebau, a chyrraedd eu potensial llawn.
Ein gweledigaeth fel Gwasanaeth Addysg yw y byddwn yn cefnogi ein holl ddysgwyr gan sicrhau eu bod yn hapus, yn ddiogel, yn ffynnu, ac yn cyflawni eu potensial personol, cymdeithasol a dysgu. Fel gwasanaeth, rydym yn ymdrechu i fod y gorau y gallwn fod ac rydym yn uchel ein parch yn lleol, gan ennill cydnabyddiaeth genedlaethol a rhyngwladol hefyd.
Rydym yn gweithio'n ddiwyd i ddarparu'r addysg o'r ansawdd uchaf posibl er mwyn datblygu-
• Dysgwyr uchelgeisiol, galluog sy'n barod i ddysgu trwy gydol eu bywydau.
• Unigolion iach, hyderus, yn barod i fyw bywydau boddhaus fel aelodau gwerthfawr o gymdeithas.
• Cyfranwyr mentrus, creadigol, yn barod i chwarae rhan lawn mewn bywyd a gwaith.
• Dinasyddion moesegol, gwybodus o Gymru a'r byd.

Arolygodd Estyn ein Gwasanaethau Addysg ym mis Gorffennaf 2023. Mae'r adroddiad cynhwysfawr, sydd ar gael ar wefan Estyn yn nodi ystod o gryfderau ac yn cadarnhau ein bod yn darparu gwasanaethau o ansawdd uchel i ddiwallu anghenion dysgwyr Sir Gaerfyrddin. Cymeradwywyd pwysigrwydd a phriodoldeb ein Strategaeth 10 mlynedd (Addysg Sir Gâr 2022-2032) i sefydlu gwasanaethau addysg gynaliadwy, gan roi ystyriaeth gadarn iawn i'r egwyddorion a nodir yn Neddf Llesiant Cenedlaethau'r Dyfodol (Cymru) 2015.

Ein hymrwymiad yw darparu cwricwlwm atyniadol sy’n adlewyrchu diwylliant, iaith a threftadaeth gyfoethog Sir Gaerfyrddin a Chymru wrth feithrin ymwybyddiaeth fyd-eang a meddwl beirniadol. Rydym yn ymdrechu i ddatblygu dysgwyr hyderus, chwilfrydig a thosturiol sydd wedi'u paratoi'n dda ar gyfer y dyfodol. Trwy addysgu arloesol a chefnogaeth ymroddedig, ein nod yw ysbrydoli cariad gydol oes at ddysgu ym mhob dysgwr.
Ein nod yw bod pob dysgwr yn cael cyfleoedd i ddod yn ddwyieithog neu'n amlieithog. Ein gweledigaeth yw ehangu addysg ddwyieithog ymhellach yn Sir Gaerfyrddin gan alluogi ein dysgwyr i ddod yn ddinasyddion dwyieithog a bod mewn sefyllfa well ar gyfer cyfleoedd cyflogaeth yn y dyfodol. Am fwy o wybodaeth am fanteision dwyieithrwydd edrychwch ar y wybodaeth gynhwysfawr ar wefan y Cyngor Sir.
Rwy'n gobeithio y bydd y ddogfen hon o gymorth i rieni/gofalwyr plant sy'n dechrau'r ysgol am y tro cyntaf, ac i rieni/gofalwyr plant sy'n symud i'r ardal. Rydym yn gwerthfawrogi y gall dewis ysgol fod yn her, ond rydym yn cydnabod pwysigrwydd y penderfyniad hwn i chi fel rhieni neu ofalwyr. Mae'r canllawiau hyn i'ch cefnogi yn y broses honno ac yn cynnwys:
• Gwybodaeth gyffredinol am ein hysgolion
• Cyngor ar sut a phryd y mae angen i chi wneud cais am le mewn ysgol.
• Y broses o ddyfarnu lleoedd a
• Amrywiaeth o bolisïau fel cludiant ysgol a allai fod yn berthnasol i'ch amgylchiadau.

Cyn cwblhau eich dewis, rydym yn eich cynghori i gysylltu â'r ysgolion yn eich ardal ac ymweld â nhw i drafod y ddarpariaeth sydd ar gael a'ch amgylchiadau unigol. Bydd gwybodaeth hefyd ar gael ar wefannau unigol ysgolion ac yn eu prosbectws.
Credwn fod addysg yn bartneriaeth rhwng yr ysgol, teuluoedd a'r gymuned ehangach. Gyda'n gilydd, gallwn sicrhau bod eich plentyn nid yn unig yn cyflawni llwyddiant academaidd ond hefyd yn tyfu'n gymdeithasol, yn emosiynol ac yn bersonol.
Byddwch yn ymwybodol nad yw mynediad i'ch ysgol ddewisol wedi'i warantu. Mae cyfyngiadau llym ar nifer y disgyblion y gellir eu derbyn i bob ysgol. Os oes mwy o geisiadau na lleoedd ar gael, rhaid prosesu'r ceisiadau a dderbynnir erbyn y dyddiad cau yn gyfreithiol yn gyntaf gyda'r meini prawf gordanysgrifio, fel y manylir yn y llyfryn hwn, a ddefnyddir i flaenoriaethu'r dyfarniad o'r lleoedd sydd ar gael. Er mwyn osgoi cael eich siomi a gwneud y mwyaf o'r cyfle i gael lle yn eich ysgol ddewisol, sicrhewch eich bod yn cyflwyno'ch cais erbyn y dyddiad cau penodedig.
Diolch am ystyried ysgol yn Sir Gaerfyrddin ar gyfer addysgu eich plentyn. Rydym yn eich gwahodd i archwilio ein prosbectws ymhellach i ddysgu mwy am y cyfleoedd gwych sydd ar gael.
Rydym yn edrych ymlaen at groesawu eich plentyn i un o'n hysgolion a dymunwn bob llwyddiant iddynt.
Gareth Morgans - Cyfarwyddwr Addysg a Gwasanaethau Plant a Theuluoedd